د افغانستان د بهرنیو چارو وزیر وایې چې حکومت د سولې او ملي پخلاینې لپاره حدود ټاکلي او په ځېنو مسایلو "مذاکره" نه کوي.
صلاح الدین رباني د پنجشنبې په ورځ په کابل کې د افغان حکومت او اروپايي ټولنې د "ځانګړې کاري ډلې" د مجلس برخه والو ته وویل چې د ټاکل شویو حدودو اساسي برخه د بشري حقونو "درناوی او رعایت" دی. ښاغلي رباني ټینګار وکړ چې حکومت پدې تړاو "مذاکره" نه کوي.
افغان چارواکي په داسې حال کې د سولې د مذاکراتو لپاره د حدودو د ټاکلو خبره کوي چې طالبان له افغان حکومت سره له مخامخ مذاکرو ډډه کوي.
صلاح الدین رباني وایې چې د روانو ناخوالو د پاي ته رسولو لپاره اړتیا ده چې د ټولو وګړو اساسي حقونو ته درناوی، ټولنیز عدالت رعایت او د قانون حاکمېت یقیني شي. د رباني په وینا دا د سولې لپاره د حکومت "اساسي شرایط" دي.