د لاس رسي وړ اتصالات

عمر چې ځانمرګي ته یې غېږه ورکړې وه، خاورو ته وسپارل شو


افغان سرتیری، عمر د ملکي وگړو د ژغورولو لپاره ځان قرباني کړ

افغان سرتیری عمر چې د نورو د ژغورلو لپاره یې په جلال اباد کې ځانمرګي بریدګر ته غېږه ورکړې وه، خاور ته وسپارل شو.

د محمد عمر جنازه د دوشنبې (اگست ٦)لغمان په مهترلام ښار کې وشوه. د محمد عمر په جنازه کې د پوځ له ځینو سرتیرو پرته هیڅ حکومتي چارواکی نه و.

په جنازه کې له ځينو پوځیانو پرته حکومتي چارواکي نه وو. کوژدنه یې د پلار په کاله پاتې شوه او له ګڼو ارمانونو سره چپه خوله د ګور غاړې ته یوړل شوه.

د کلي همزولي یې ویر کوي اود سنګر یاران پرې خاورې اړوي. ورور یې وايي نه ژاړي ځکه ۲۸ کلن عمر غیرتي و.

د هدیرې پر غاړه دیني عالم د عمر د مېړانې او دیندارۍ کیسې کوي، وايي دا د وطن قرباني دی. د عمر د کشرۍ خور صابرې مرۍ وچه شوې، وايي ټوله شپه یې په خپل ورور پسې ژړلي خو هغه بېرته نه راځي.

د دروازې په خوله کې له همزولو کلیوالو سره ناسته ده، د ښوونځي درېیم ټولګی یې لوستلی ، خو وايي نور لکه چې پاتې شو.

عمر دوه نور مشران ورونه هم لري، خو د هغوی ګټه وټه بېله ده، مور یې، وړکۍ صابره او کونډه خور چې خاوند یې په عسکرۍ کې وژل شوی و، د عمر لاس ته ناست و، خو اوس دا ټول بې اسرې شول.

سرتړلې سپین سرې مور یې وايي یوه میاشت کېږي چې د عمر پلار مړ شوی، له اختر وروسته یې زوی ته د واده کولو نیت و، خو دې هر څه سر وخوړ.

وايي د پردي په کاله کې ژوند کوي، زوی یې ځمکه واخیسته، خو ودانه یې نه شوه کړای. اوس نو عمر لاړ خو مور او دوه خویندې یې په اسرې شوې.

XS
SM
MD
LG