د لاس رسي وړ اتصالات

جمعیت او جنبش فاریاب کې د جنګ پړه پر یو بل اچوي


د فاریاب ولایت د المار په ولسوالۍ کې د جمعیت او جنبش وسله والو ډلو ترمنځ له څو ورځو راهیسې جنګ روان دی

د بلخ سرپرست والي او د جمعیت اسلامي ګوند اجرايي مشر عطا محمد نور په خپل فیسبوک کې پر جنبش ګوند له توندو نیوکو او تورونو یوه ډکه اعلامیه خپره کړې ده. هغه د ملي یوالي پر حکومت غږ کړی دی، چې په فاریاب کې د جنبش د ملیشو د خپلسریو او وژنو مخه ونیسي.

ښاغلي عطا دعوه کوي چې د نظام الدین او حنیف الماري په نومونو د جنرال دوستم دوو قومندانانو د سه شنبې په ماښام د جمعیت د قومندان، فاروق قاطع پر پوستو بریدونه کړي او د دواړو غاړو یو شمېر کسان وژل شوي دي.

فاروق قاطع په فاریاب کې د سیمیزو پولیسو مشر دی. ښاغلي عطا لیکلي "د جنرال دوستم قومندانانو په دغو بریدونو کې د جمعیت ګوند د ځوانانو د څانګې مشر، زمان قاطع، هم وژل شوی دی".

خو، د جنرال دوستم پلویان د بلخ د سرپرست والي دا ادعاوې په کلکه ردوي او تور لګوي، چې لومړی جنرال قاطع د جنبش پر غړو بریدونه کړي دي.

د جنبش ویاند، بشیر احمد تهینج، چې په پارلمان کې د فاریاب وکیل هم دی، امریکا غږ اشنا ته وویل د دغو قومندانانو ترمنځ له پخوا تربګني وه "هغوی غوښتل چې خپلو سیمو ته بېرته وګرځي او عادي ژوند وکړي، مګر د جمعیت قومندان، قاطع یې مخه نیولې چې بیا دا پېښه شوې ده".

ښاغلي تهینج دا خبره په کلکه رد کړه، چې ګنې جنبش ګوند دې د جمعیت پر غړو برید کړی وي. هغه وویل، هلې ځلې یې پیل کړي چې پېدا شوې ستونزه د خبرو له لارې حل کړي.

نوموړي همدغه راز پر عطا محمد نور تور ولګوه چې په شمال کې د جنبش"له نفوذ نه ډاریږي او له ډېر وخته یې د مخنیوي هلې ځلې او د نوم بدولو هڅې کوي".

د عطا محمد نور په اعلامیې کې دا هم ویل شوي چې د کورنیو چارو وزارت او د فاریاب د امنیې قومندانۍ پر روان تاوتریخوالي هېڅ غوږ هم نه دی ګرولی.

د فاریاب ولایت د المار په ولسوالۍ کې د جمعیت او جنبش د دغو وسله والو ډلو او ملیشو ترمنځ له څو ورځو راهیسې جنګ روان دی.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. لومړۍ ماستري یې په ۲۰۱۳ کال کې (له لېرې واټن- Distance Learning) د هند په اندرا ګاندي پوهنتون کې په سیاسي علومو کې کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG