د افغان حکومت یوې سرچینې ویلي دي چې د افغانستان سترې محکمې د حکومت د کابینې د اوه وزیرانو د صلاحیت د سلبولو د موضوع په اړوند د ولسي جرگې تصمیم تائید کړی دی.
دغې سرچینې چې نه یې غوښتل نوم یاد شي، د امریکا غږ ته وویل چې سترې محکمې ویلي دي چې د وزیرانو د صلاحیت ردول او یا تائیدول د ولسي جرگې کار دی.
وروسته له هغې چې د افغانستان ولسي جرگې د هیواد د کابینې د اوه وزیرانو څخه چې په خپلو وزارتونو کې د ٧٠ فیصد انکشافي بودجې په لگولو کې پاتې راغلي وو خپل باور بیرته واخیست، د افغانستان جمهوري ریاست په دې اړه د وروستۍ پریکړې لپاره مسله سترې محکمې ته وړاندې کړه.
د افغانستان د جمهوري ریاست د ویاند مرستیال دوا خان مینه پال د امریکا غږ ته وویل چې تر اوسه سترې محکمې په رسمي توگه خپله پریکړه د جمهوري ریاست سره نه شریکه کړې.
ښاغلي مینه پال زیاته کړه کله چې سترې محکمې خپله پریکړه ارگ ته راواستوله په اړه به یې غبرگون څرگند شي.