د امریکا جمهور رئیس دونالد ټرمپ د استرالیا نه امریکا ته د شاوخوا ١٢٥٠ مهاجرو د تبادلې معامله "احمقانه" او "خورا خرابه" وگڼله.
په دې ترڅ کې د واشنگټن پوست ورځپاڼې د استرالیا د صدراعظم او د ښاغلي ټرمپ ترمنځ د یو جنجالي ټلیفوني مکالمې خبر ورکړی دی چې ددې ورځپاڼې د رپوټ په بنسټ کیدای ددغو دوو اوږدمهاله متحدو هیوادونو ترمنځ ټینگې اړیکې خرابې کړي.
د استرالیا د صدراعظم مالکوم ترنبول سره د ښاغلي ټرمپ ټلیفوني تماس د یو ساعت لپاره پروگرام شوی و، خو د واشنگټن پوست ورځپاڼې د رپوټ له مخې ښاغلي ټرمپ له ٢٥ دقیقو خبرو وروسته دغه تیلیفوني تماس هغه وخت بند کړ چې ښاغلي ترنبول د سوریې په کړکیچ خبرې پیل کړې.
د استرالیا صدراعظم خبریالانو ته وویل چې د ښاغلي ټرمپ سره د هغه خبرې نیغ په نیغه وی، خو په دې اړه یې له زیاتو جزییاتو د څرگندولو نه ډډه وکړه.
وروسته له هغې چې دغه تیلیفوني تماس د خبرونو سرلیکه شو، ښاغلي ټرمپ په خپل ټویټر کې ولیکل "باور کوئ؟ د اوباما حکومت موافقه کړې ده چې په زرگونو غیر قانوني مهاجر له استرالیا نه ومني. ولې؟ ددې احمقانه معاملې په اړه به غور وکړو".
د امریکا پخواني جمهور رئیس باراک اوباما، د تیر کال په وروستیو کې د استرالیا سره په یوه جنجالي معاملې کې موافقه وکړه چې شاوخوا ۱۲۵۰ غیر قانوني پناه غوښتونکي چې اکثر یې د افغانستان، عراق او ایران دي او د ناورو او پاپوا نیوگینی د مهاجرو په کمپونو کې میشت دي، په امریکا کې ومني.
په بدل کې استرالیا ددې معاملې په بنسټ موافقه کړې وه چې د السلوادور، گواتیمالا او هندوراس د هیوادونو مهاجر په خپله خاوره کې ومني.
د سپینې ماڼۍ ویاند شان سپایسر، او د په استرالیا کې د متحده ایالاتو سفارت دواړو ویلي دي چې جمهور رئیس ټرمپ به دغه معاملې ته درناوی وکړي.
د مهاجرو د تبادلې د جنجالي معاملې په اړوند د واشنگټن او کانبیرا په اړیکو کې تاوتریخوالی ښایي جدي عواقب ولري.
استرالیا او د امریکا متحده ایالات د "پنځو سترگو" په نامه د پنځو هیوادونو په ډله کې شامل دي چې په نړۍ کې د استخباراتي اطلاعاتو د تبادلې تر ټولو پرمختللې او ستره شبکه ده.
متحده ایالات همداشان غواړي چې سږکال نورې پوځي الوتکې د استرالیا د شمال په استوایي سیمو کې ځای پر ځای کړي. په دې سره به د چین جنوبي جنجالي سمندرگي ته نژدې ساحو کې د امریکا شتون پیاوړی شي.
له دې سربیره استرالیا د لسو هیوادونو له ډلې څخه ده چې د امریکا د متحده ایالاتو څخه اف ۳۵ پرمختللې جنگي الوتکې اخلي.