د طالبانو د حکومت چارواکي وایي د کابل په لویدیځ د دشت برچي په سیمه کې په یو مسافر وړونکي موټر کې د اور لګیدو له کبله یو ملکي کس وژل شوی او ۳ نور ټپي شویدي.
د طالبانو د حکومت ویاند ذبیح الله مجاهد د پیښې په هکله په ټویټر کې لیکلي چې "ظاهراً" په ټونس موټر کې د اور لګیدو له امله چاودنه شوې.
ښاغلي مجاهد د پیښې په هکله نور معلومات ندي ورکړي خو وایي چې د پیښې د علت او څرنګوالي په اړه پلټنې روانې دي.
بل پلو عیني شاهدان وایي چې اور د چاودنې له کبله لګیدلی. یو شمیر عیني شاهدانو ادعا کړې چې په موټر کې مقناطیسي ماین ځای پر ځای شوی و چې د چاودنې نه وروسته موټر اور اخیستی.
سره لدې چې د کابل لویدیځه او په ځانګړې توګه د دشت برچي په سیمه کې چې ډیری اوسیدونکي یې شعیه ګان او هزراه ګان دي تر دې وړاندې د داعش وسله والې ډلې څو بریدونه کړي خو تر اوسه هیڅ کومې ډلې ددې برید د کولو ادعا نده کړې.
د همدې سیمې د سید الشهدا په یو ښوونځي د روان کال د غوایي د میاشتې په ۱۸ مې یوې خونړۍ حملې کې لږ تر ږله ۱۵۰ تنه ووژل شول چې ډیری یې د ښوونځې زده کوونکې نجونې وې.
تر دې برید وړاندې د همدې سیمې د کوثر په ښوونیز مرکز چاودنه وشوه چې ۱۸ تنه پکې ووژل شول او ۵۷ نور ژوبل شول.
په یو بل برید کې چې د سیمې په یو نسایي ولادي روغتون کې وشو د ماشومانو او میرمنو په ګډون پکې ۱۴ ملکیان ووژل شول او ۱۵ نور ټپي شول.
د همدې سیمې د موعود په روزنیز مرکز هم برید شوی چې ۴۰ تنه پکې وژل شوي او لږ تر لږه ۶۷ نور ټپي شوي و.