د لاس رسي وړ اتصالات

ولې بریتانیا د کروناویروس زرګونه معاینات امریکا ته استولي؟


بریتانیا د خپلو اوسیدونکو د کووید۱۹ د تشخیص په زرګونو نمونې د امریکا متحده ایلاتو ته لیږلي چې نتیجه یې معلومه شي.

د سنډی تیلګراف ورځپانې رپوټ ورکړی چې تیره اونۍ د بریتانیا د اوسیدونکو د کروناویروس ۵۰ زره نمونې په یو ځانګړي پرواز کې د امریکا متحده ایالاتو ته استولي تر څو تشخیص شي چې دغه کسان په کووید۱۹ اخته دي او که نه.

د بریتانیا د کورجوړولو، ټولنیزو چارو او محلي حکومتدارۍ وزیر رابرت جینریک، نن د می په ۱۰ (غوایي ۲۱) سکای نیوز ته وویل چې: "زمونږ یو لابراتوار ستونزه درلوده او مونږ د احتمالي پلان په اساس یو شمیر معاینات د تشخیص لپاره متحده ایالاتو ته واستول."

هغه وویل چې دغه اقدام ددې هیواد د روغتیا وزارت د طرحې په اساس شوی چې دمخه پلان شوې وه.

بریتانیا وروسته له هغې چې د معاینو د ورو ترسره کولو په وجه تر انتقاد لاندې راغله د اپریل د میاشتې په پای کې یې د ورځې ۱۰۰ زره معاینو د تشخیص کولو هڅه پیل کړه، خو د دومره شمیر معاینو ترسره کول ستونزې درلودې.

بریتانیا تر اوسه په کروناویروس باندې د ۲۱۵۲۶۰ تنو د اخته کیدو او ددې ویروس په وجه د ۳۱۵۸۷ تنو د مړینې خبر ورکړی دی چې دې شمیر په نړیواله کچه د امریکا وروسته دا هیواد په دوهم کتار کې درولی دی.

د امریکا متحده ایالات د څه دپاسه یو میلیون او ۳۰۹ زره اخته کسانو او ۷۸۷۹۴ تنو په مړینې سره د کروناویروس د خپریدو له درکه د نړیوال جدول په سر کې دی.

کروناویروس لومړی ځل تیر کال د چین د هوبي ولایت په ووهان ښار کې رامنځ ته شوه او له هغه ځایه ټولې نړۍ ته خپره او په وبا بدله شوه.

د امریکا د جانس هاپکینز پوهنتون د شمیرو له مخې د یکشنبې د ورځې می ۱۰ (غوایي ۲۱) تر سهاره په نړۍ کې څه دپاسه څلور میلیونه کسان په کووید۱۹ اخته شوي او تر اوسه نژدې ۲۸۰ زره تنه مړه شوي دي.

XS
SM
MD
LG