د کندهار امنیتي چارواکي وايي، د خرقې شریفي په زیارت کې د دو متولیانو ترمنځ په وسله واله نښته کې کوم زیان نهدی رامنځته شوی او دواړه لوري بې وسلې شوي دي.
تېر کال د ولسمشرۍ ماڼۍ له لوري د خرقې مطهرې د متولیانو د امنیت لپاره ۷۰ تنه د رجال برجسته پوليس په دنده ګمارل شوي.
عیني شاهدان وايي، چې د خرقې شریفې د متولیانو نسیم اخند زاده او مسعود اخند زاده ترمنځ د مالي مسایلو پر سر تر لفظي شخړې وروسته وسله واله نښته رامنځته شوه چې یو ساعت يې دوام وکړ.
مسعود اخند زاده د جنوبي حوزې لپاره د سولې په چارو کې د ولسمشر غني د سلاکار دنده هم لري.
په یاده نښته کې یو پوليس ټپي شوی او نور زیان چاته زیان نهدی رسېدلی، خو د وسلو ډزو کندهار ښاریان په اندېښنه کې کړي وو.
تر پېښي یو ساعت وروسته د کندهار د امنيې قومندانۍ د پوليسو له لوري سیمه کلا بنده شوه او دواړي خواوي بې وسلې شوې.
د کندهار د امنيې قومندانۍ له لوري په خپره شوې اعلامیه کې ویل شوي چې پوليسو له دواړو لورو څخه وسلې را ټولي کړې چې پکښې سپکې او درنې وسلې شاملي دي.
اوس د سیمي امنیت د پوليسو له لوري ساتل کېږي.
د کندهار د والي ویاند عزیز احمد عزیز امریکاغږ اشنا راډیو ته وویل چې د خرقې شریفي د متولیانو ترمنځ د وسله والي نښتې په اړه ولایت مقام یوه پلاوي ته د پلټنو لار ښوونه کړې.
نوموړي پهدې اړه وويل:"پر ۱۱ بجو نښته وشول او تر څه باندې ۱۲ بجو د متولیانو امنيتي کسان یو بل ته په کمین کې وو وروسته پوليسو مداخله وکړه او اوس یو پلاوی تحقيق کوي."
هڅه مو وکړه چې خپله د خرقې شریفي د متولیانو نسیم اخند زاده او مسعود اخند زاده نظر هم واخلو خو دواړو لورو له خبرو کولو څخه ډډه وکړه.
د خرقې شرقې شریفي د زیارت لپاره ولسمشرۍ ماڼی مستقل ریاست رامنځ ته کړی چې هره میاشت ځانګړې بودیجه ور کول کېږي.
د خرقې شریفي د متولیانو د کورنۍ یوه غړي چې نه يې غوښتل نوم يې خپور شي اشنا راډیو ته وويل چې د دو متولیانو ترمنځ وسله واله نښته د یادي بودیجې د ونډي پر سر رامنځته شوې.
