د امریکا د متحده ایالاتو د جمهوري ریاست د انتخاباتو په لړ کې نن په شپږو ایالتونو کې دیموکراتان او جمهوري غوښتونکي په مقدماتي انتخاباتو کې برخه واخیسته. په محلي وخت د شپې تر لسو بجو یوازې د نیوجرسي ایالت د رایو نتیجه معلومه شوې.
د دیموکرات د ګوند مخکښې کاندیدې هیلري کلنټن او د جمهوري غوښتونکو د ګوند کاندید ډانلډ ټرمپ وکړی شو چې پدې ایالت کې خپلو سیالانو ته ماتې ورکړي.
دغه ایالت ۱۲۶ دیموکرات او ۵۱ جمهوري غوښتونکي استازي لري.
امریکایي مطبوعاتو د استازو د شمیر پر اساس د بهرنیو چارو پخوانۍ وزیره هیلري کلنټن د دیموکرات د ګوند احتمالي کاندیده اعلان کړیده خو د هغې سیال سناتور برني سنډرس بیا ویلي دي چې انتخاباتي مبارزه به یې روانه وي او د ګوند د کنوانیسیون تر نیټې پورې به مبارزه کوي.
د دیموکرات د ګوند کنوانیسیون چې د ګوند وروستی کاندید پکې اعلانیږي، د جولای د میاشتې په پنځه ویشتمې نیټې د فلاډیلفیا په ښار کې کیږي.
د جمهوري غوښتونکو د ګوند مخکښ او یوازیني کاندید ډانلډ ټرمپ بیا د نیوجرسي په ایالت کې د مقدماتي انتخاباتو تر ګټلو وروسته د نیویارک په ایالت کې خپلو پلویانو ته په وینا کې چې " د جمهوري غوښتونکو په تاریخ کې یوه کاندید دومره زیاتې رایې ندي ګټلې لکه څومره چې نن ما ته خلکو راکړیدي. "
ډانلډ ټرمپ د خپلو پلویانو سره ژمنه وکړه چې راتلونکې اوونۍ به یوه مهمه وینا کوي او د کلنټن د کورنۍ په هکله به داسې معلومات افشا کړي چې "د ټولو به خوښ وي"
ټرمپ د جمهور رئیس اوباما د حکومت د سواګرۍ په ځینو تړونونو هم انتقاد وکړ او وې ویل چې دا تړونونه د امریکا لپاره "ناوړه پایلې لري"
ډانلډ ټرمپ د ګوند د یووالي غږ وکړ او د دیموکرات د ګوند په مخکښې کاندیدې هیلري کلنټن او جمهور رئیس اوباما په حکومت یې سخت انتقادونه وکړل.
ټرمپ د امریکا د انتخاباتو سیستم د درغلیو نه ډګ وګاڼه او په سیاستمدارانو یې تور ولګاوه چې " په لوی لاس یې نظام پدې بڼه ساتلی" ټرمپ وایي سیاستوال هیڅ وخت نه غواړي چې دا نظام بدل شي ځکه چې "پدې کې د هغوي او د هغوي د ملګرو ګټه ده."
ننني مقدماتي انتخابات په کالیفورنیا، مونټانا، شمالي ډکوټا، جنوبي ډکوټا، نیو مکسیکو او نیوجرسي په ایالتونو کې تر سره شول.