مصریان نن په لومړیو پارلماني انتخاباتو کې رایې اچوي. په مصر کې د فبرورۍ په میاشتې کې د عمومي پاڅون نه وروسته چې د پخوانی جمهورریس حسنی مبارک دیرش کلنه واکمنې یی ختمه کړه ، په لومړی ځل دغه انتخابات کیږي.
رای اچوونکي نن د دوشنبې په ورځ وختي، د رایو د مرکزونو د خلاصیدو نه ډیر د وخته کتار ولاړ وو .
په زرگونو قاضیانو د انتخاباتو د جریان څارنه کوله.
د ولسي جرگې کاندیدانو ته د رای ورکولو مرکزونه د قاهرې اوالکساندریې په لویو ښارونو او همدغه راز لکسور ، پورت سید او په پنځو نورو ولایتونو کې دي. ټاکل شویده چې په دغو ځایونو کې دویم ځلي انتخابات د ډسمبر په پنځمه وشي.
د مصر په ٢٧ ولایتونو کې په دریو جلا دورو کې چې په جنورۍ کې ختمیږی رای گیري کیږي.
د سنا د جرگې د پاره انتخابات د مارچ په اخره کې ختمیږی اوبیا به پارلمان نوی اساسی قانون لیکي.
اخوان المسلمین چې یو اسلامي ګوند دی د ١٩٥٠ د لسیزې راهیسې په رسمي ډول غیر قانوني شویدی، داسي ښکاري چې د ملک په دې انتخاباتو کې چې د قریب ٦٠ کالو راهیسې په کي استبدادی نظام چلیده، قوی رول وگټي.
خو د مصر واکمنو جنرالانو داسي انتخاباتی سیستم جوړکړیدی چې ډیرو سره دا اندیښنه موجوده چې داسي یو پارلمان به انتخاب شي چې اعتماد او باور به ورباندی نه شي کیدی.
د پوځ جنرالانو داڅرگنده کړیده چی نوی پارلمان به دا صلاحیت ونلری چه هغه حکومت لیری کړی چه واکمنی نظآمی شورا جوړ کړی وي.