د یکشنبې په ورځ (د جولای پنځمه) په ټولنیزو رسنیو خپرې شوې ویډیوګانې ښيي چې د فرانسې په سوېل لوېدیځ کې د ودانیو ترڅنګ د ځنګل له اور څخه لوګي هوا ته پورته کېږي.
دغه اور وروسته د هسپانیې پولې ته نږدې له شاوخوا ۲۴ کوچنیو ښارونو او کلیو څخه د څه باندې ۱۰ زره کسانو د ایستلو سبب شو.
چارواکو ویلي چې تمه ده د دوشنبې په ورځ (د جولای شپږمه) زورور بادونه اور لا پسې پراخ کړي.
اروپايي ټولنې ویلي چې د اور وژنې د عملیاتو د مرستې لپاره یې له قبرس او سویډن څخه فرانسې ته د اوبو شیندونکي څلور الوتکې استولې دي، څو د پرپینیان ښار شاوخوا له اور وژونکو سره مرسته وکړي.
د سیمې د حکومت استازي پیېر رېګنو دو لا موټ ویلي چې اور د پیرېنې په نوم د فرانسوي غرونو په لمنو کې شاوخوا ۴,۶۰۰ هکټاره ځمکه سوځولې ده.
د روان کال د مې او جون میاشتو د اوړي لومړنیو سختو ګرميو په فرانسه او د لوېدیځې اروپا په نورو سیمو کې پراخې ځمکې وچې کړې دي، چې له امله یې سږ کال دغه سیمې د ځنګلي اورونو پر وړاندې ډېرې زیانمنونکې شوې دي.
فورم \ دبحث خونه