د مۍ ۱۷ د یکشنبې په ورځ په نړۍ کې د همجنسبازۍ نه د ویرې پر ضد د ورځې په نامه لمانځل کیږي.
د امریکا ولسمشر بارک اوباما د دغې ورځ په مناسبت وویل چې د برابرۍ او مساواتو لپاره جګړه " په یوه ورځ نه ګټل کیږي،" بلکې دا جګړه به تر هغه روانه وي چې د ده په خبره، ټول خلک ازاده او مساوي ژوند ولري، درناوی یې وشي او برابر حقونه ولرو.
په همدې حال کې د امریکا د ملي امنیت مشاورې سوزان رایس وویل چې متحده ایالتونه به " په نړۍ کې په کلکه د همجنسبازانو او د هغوی د حقونو د مدافعانو ترڅنګ ودریږي او دې اصل ته به کار وکړي چې د همجنسبازانو ټول حقونه، بشري حقونه دي."
مېرمن رایس وویل د ګامبیا د ولسمشر یحی جامه " د نه منلو وړ وروستۍ څرګندونې دا خبره نوره هم روښانه کړو چې موږ ولې باید د داسې یوې نړۍ په لټه کې شو چې هر څوک په کې د تشدد او تعقیب له ویرې پرته، ژوند وکړي."
ښاغلي جامه تېره اونۍ ویلي وو چې په خپل هېواد کې به د هغه نر یا سړي " مرۍ غوڅه کړي " چې له بل نر او سړي سره واده کول غواړي.
مېرمن رایس پر ټولو هېوادونو غږ وکړ چې " د خلکو د نړیوالو او اساسي حقونو او ازادیو او په خلکو کې د زغم پېدا کولو په برخو کې کار وکړي. "
د همجنسبازۍ د حقونو او ملاتړ خبره لا همپه امریکا او د نړۍ په یو شمېر نورو هېوادونو کې لانجه پاروونکې موضوع ده، چې لا هم پرې خبرې کیږي.
دغه ورځ داسې مهال لمانځل کیږي چې، څو ورځې مخکې د اروپايي هیواد لوګزامبورګ لومړي وزیر خاویر بتل، له یو بل سړي سره واده وکړ.
دی په اورپا کې لومړنی وزیر بلل کیږي چې له خپل همجنس سره واده کوي.