د لاس رسي وړ اتصالات

حمید ګل مړ شو


جنرال حمید له ۱۹۸۷ نه تر ۱۹۸۹ کاله پورې د پاکستان د استخباراتو مشر و

د پاکستان مطبوعاتو خبر ورکړی چې د دغه هېواد د استخباراتو پخوانی مشر جنرال حمید ګل د مغزي سکتې له کبله مړی شوی دی.

راپورونه وايي چې حمید ګل خپلې کورنۍ سره مرې ته تفریح لپاره تللی و چې ناڅاپه ناروغه شو او د جمعې په ورځ یو پوځي روغتون ته انتقال کړل شو چې همدلته بیا مړ شو.

د هغه لور عظما گل وویل چې پلار یې د شنبې په ورځ په مري کې نظامي روغتون ته ورسول شو، مگر د ډاکټرانو د زیاتو هلوځلو سره سره د هغه ژوند ونه ژغورل شو.

د هغه پر رسمي فیسبوک پاڼې لیکل شوې چې د هغه جنازه به نن یکشنبه په ځایي وخت د مازدیګر په شاوخوا پنځو بجو وشي، ویل کیږي چې د هغه یو زوی په ترکیې کې دی او جنازه هم د هغه لپاره ځن‌‌‌‌‌‌ډول شوې ده.

جنرال حمید گل د ١٩٣٦ کال د نومبر په ٢٠مه په سرگوده کې زیږیدلی و.

د حمید ګل لور د پاکستان ملي تلویزون ته د خپل ۸۰ کلن پلار د مرک خبر تاید کړی دی.

د هغه په فیسبوک پاڼې د هغه د مرک د خبر تر خپرېدو څو دقېقې مخکې لیکل شوي وو" جنرال صاحب په روغتون کې بستر دی، د هغه د صحت لپاره دوعا وکړﺉ."

جنرال حمید ګل چې دا مهال د پاکستان یو متقاعد پوځي جنرال و، د ۱۹۸۷ او ۱۹۸۹ کلونو ترمنځ د پاکستان د استخباراتي ادرې آی اس آی مشر و.

هغه پر افغانستان د شوروي ځواکونو د یرغل پر مهال د افغان مجاهدینو سره نژدې اړیکې پاللې او همدغه راز ویل کیږي چې د طالبانو له مشرانو سره یې هم نژدې اړیکې درلودې او دهغوی د تحریک په جوړولو کې یې هم لاس لاره.

د پاکستان رسنۍ وايي چې حمید ګل د پنجاب په سرګوده سیمې کې زېږېدلی و او کورنۍ یې له سوات نه لاهور ته کوچېدلې وه.

جنرال حمید ګل په خټه مهمند پښتون و.

هغه د پاکستان په بهرني او کورني سیاست کې یو اغیزناک شخصیت بلل کېده، خو په افغانستان کې د سیاسي چارو یو شمېر شننوکي هغه تورنوه چې د افغانستان په اړه یې منفي تګلاره درلوده.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. لومړۍ ماستري یې په ۲۰۱۳ کال کې (له لېرې واټن- Distance Learning) د هند په اندرا ګاندي پوهنتون کې په سیاسي علومو کې کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG