د لاس رسي وړ اتصالات

د غزني په جګړو کې طالبانو ته د درنو تلفاتو د اړولو ادعا


د غزني ولایتي چارواکي وايي، تیره شپه د دغه ولایت په څو برخو کې د افغان ځواکونو او وسله والو طالبانو ترمنځ جګړې شوي.

د غزني ولایتي چارواکي په دغه ولایت کې د افغان امنیتي ځواکونو او وسله والو طالبانو ترمنځ د سختو جګړو خبر ورکړی او په دغو جګړو کې یې طالب وسله والو ته د درنې مرګ ژوبلې د اړولو ادعا کړې ده.

د غزني د والي ویاند عارف نوري امریکا غږ اشنا راډیو سره په مرکه کې وویل، چې دا جګړې د د غزني او پکتیکا ولایتونو ترمنځ د لارې په اوږدو کې شوي، چې په ترڅ کې یې د ښاغلي نوري د ادعا له مخې په ځمکنیو او هوایي بریدونو کې۳۱ وسله وال طالبان وژل شوي او ۱۸ نور ټپیان شوي دي.

هغه وویل، چې په دې جګړو کې د ملي اردو یو صاحب منصب وژل شوی او پولیس ټپي شوی دی.

ښاغلي نوري وویل " تیره شپه وسله مخالفانو د غزني او پکتیکا په لویه لار د دوو جرونو په ایستلو د غزني د مرکز په شاوخوا پوستو، د غزني او پکتیکا ترمنځ د لویې لارې پر پوستو او د انډر پر ولسوالۍ د ډله ییز برید نیت درلود، چې د برید د پیل وړاندې د افغان امنیتي ځواکونو د ځمکنیو او هوایي بریدونو سره مخ شول".

د غزني ولایتي چارواکي وايي، په هوايي بریدونو کې د بهرنیو ځواکونو بې پیلوټه الوتکو هم برخه لرله.

تراوسه وسله والو طالبانو د غزني د ولایتي چارواکو د ادعاو په اړه غبرګون نه دی ښودلی.

همداشان د غزني ولایتي چارواکي وايي، چې په تیرو څلورویشت ساعتونو کې په دغه ولایت کې په بیلو امنیني پيښو کې درې ملکي وګړي وژل شوي او اوه نور ټپیان شوي دي.

XS
SM
MD
LG