د امریکا د اردو په سلګونو تازه خپاره شوي پټ اسناد د ګوانتانامو د زندان د اوو سوو زندانیانو معلومات ښيي. د امریکا غږ کیرولاین پریسوټي دا څېړلې چې ددغو اسنادو خپرېدل به د امریکا پر نظامي زندانونو او د ګوانتانامو د زندان په بندېدلو څه اثر ولري.
د ویکیلیکس په دغو اسنادو کې د ګوانتانامو د تیرو نهو کلونو تقریبا د ټولو زندانيانو معلومات شته.
نیویارک ټایمز ورځپاڼې هغه شواهد نیمګړي بللي چې په اساس یې دا بندیان نیول شوي او د دوی له خوا د پیښ خطر په اړه د ممکنه او نامعلوم کلمې لیکل شوي دي.
د ۲۰۰۲ کال راهیسې نږدې ۶۰۰ زندانیان له ګوانتانامو ایستل شوي او دا وخت یې د زندانیانو شمیر ۱۷۲ دی. میشل مکلور په واشګټن کې د امریکن پوهنتون د نظامي عدل د انسټیټوټ رئیسه ده، دا وايي: ((د ګوانتانامو ځینې بندیان د سزا وړ دي خو ځینو نور یې هیڅ جرم ندی کړی))
پنټاګون وايي خپاره شوي ځینې اسناد زاړه او تاریخ یې تیر شوی دی او زیاتوي که د ګوانتانامو د ساتونکو او څارنوالانو نومونه افشا شي د زندان چارې ښايي اغېزمنې کړي.
سپینې ماڼۍ هم ددې اسنادو خپرېدل وغندل. ویاند جې کارني وویل جمهور رئیس اوباما د ګوانتانامو تړلو ته ژمن دی. خو څیړونکي وايي دا کار ممکن نه بریښي ځکه چې د زندانیانو دوسیې بیرته اردو ته انتقال شوي او کانګرس هم ددغه زندان د تړلو لګښت ندی تصویب کړی.
مایکل اوهانلن، په واشنګټن کې د بروکینګز تحقیقاتي مرکز تحلیلګر: ((فکر کوم اوباما بند پاتې دی. فکر کو هغه پرې پوهیږي او دا به حالت بدل نکړي))
اوهانلن او مکلور دواړه څیړنکي په دې عقیده دي چې د مشکوکو ترهګرو لپاره د ګوانتانامو زندان حقوقي ننګونې رامنځته کړي دي.
اوهانلن: ((په دې اړه تل انتقاد کیده، د ګوانتانامو د نظریې ټوله چالاکي پدې کې وه چې بندیان باید د امریکا له خاورې بیرون وساتل شي ـ خو بیا هم دغه سیمه د امریکا تر کنترول لاندې ده))
مکلور: ((که خلک د جګړې له سیمې لرې نیسې، دا غوره لاره نده. ته دوی د داسې کسانو له منځ نه نیسې چې ممکن اسناد راوړي چې خلک بد دي او یا ووايي چې دا خلک په غلط وخت کې په غلط ځای کې وو))
څیړونکي وايي، د ویکیلیکس ورستیو خپرو شویو اسنادو یو ځل بیا د زندانیانو او د ګوانتانامو زندان ته د خلکو پام اړولی دی، د اوباما ادارې کوښښ کاوه چې له دې نه د خلکو پام واړوي.