د روانې اونۍ په جریان کې د امریکا د استازو د مجلس دېموکرات وکیلان د ولسمشر د استیضاح په تړاو د خپلو علني غونډو راپور لیکي.
په تېرو دوو اونیو کې شاوخوا دوولسو شاهدانو په علني غونډو کې د امریکا او اوکراین د ولسمشرانو د ټېلفوني مکالمې په اړه موثق معلومات ورکړي دي.
دغه مکالمه د جولائ په ۲۵ نېټه شوې وه. شاهدانو ویلي چې ولسمشر ډانلډ ټرمپ د خپلو سیاسي ګټو لپاره پر اوکراین ۳۹۱ میلیون ډالر مرستې ځنډولې وې.
همدارنګه، شاهدانو د استازو مجلس وکیلانو ته ویلي چې د ټرمپ شخصي وکیل روډي جولیاني د اوکرایني چارواکو لخوا د ولسمشر پر انتخاباتي سیال او د ۲۰۲۰ کال د جمهوري ریاست د ټاکنو دېموکرات نوماند جوبایډن باندې د تحقیقاتو د اعلانولو لپاره فشار راوړی و.
د استازو د مجلس دېموکراتې مشرې ننسي پلوسي ویلي چې دوي د ولسمشر د استیضاح د تحقیقاتو لپاره سند لري.
مېرمن پلوسي وایې چې ولسمشر ټرمپ د "خپلو شخصي ګټو" لپاره له واک نه ناوړه استفاده کړې او د امریکا "ملي امنیت یې له پامه غورځولی دی".
ولسمشر ټرمپ روان تحقیقات یوه دسیسه بولي.
په وروستیو میاشتو کې د ولسمشر د استیضاح له تحقیقاتو نه د ولسونو ملاتړ زیات شوی دی. دیموکراتان چې د استازو په مجلس کې د استیضاح پر مواردو رای ګیرۍ ته چمتوالی نیسي، هیله مند دي چې دا بهیر دوام ومومي او له راتلونکي عیسوي کال نه مخکې په سنا کې تحقیقات پیل شي.
