د جنوبي کارلیونا والۍ چې په بهرنۍ پالیسۍ کې هیڅ تجربه نلري د سه شنبې په ورځ د رایو په اکثریت سره په ملګرو ملتونو کې د متحده ایالاتو د نوې سفیرې په توګه منظوره کړله.
د سنا په مجلس کې د بهرنیو اړیکو د جرګه ګۍ رئیس سناتور باب کورکر وایي چې میرمن هیلي " ثابت شوې مشره ده" او په ملګرو ملتونو کې به د امریکا "ښه استازیتوب وکړي."
نیکي هیلي ته د سنا د مجلس ۹۶ غړیو مثبتې او یوازې څلور د رد رایې ورکړلې. پنځه څلویښت کلنې نیکي هیلي چې مور او پلار یې د هند دي، ژمنه کړې چې په ملګرو ملتونو کې د اصلاحاتو د راوستلو لپاره به کار کوي، د بشري حقونو لپاره به مبارزه کوي او د نړیوالو ادارو ملاتړ به کوي.
نیکي هیلي د ۲۰۱۱ کال راهیسې د جنوبي کاریلونا والۍ ده خو پدې تیرو څو کالونو کې د جمهوري غوښتونکو په ګوند کې محبوبیت زیات شویدی.
د میرمن هیلي شهرت په ۲۰۱۵ کال وروسته تر هغه لا پسې زیات شو کله چې هغې د جنوبي کاریلونا د ایالت د مرکز نه د "کانفډریټ" د وخت بیرغونه ټول کړل. هغې دا کار وروسته تر هغې وکړې چې یو سپین پوستي امریکایي په یوې کلیسا کې نهه تور پوستي امریکایان ووژل.
نیکي هیلي د جمهوري ریاست د انتخاباتي مبارزو پر وخت د جمهور رئیس ډونالډ ټرمپ سره خپل ملاتړ نه و څرګند کړی او خبرداری یې ورکړی و چې د هغه ځینې څرګندونې په ټولنې کې "کرکه" پیدا کوي.
هغې د سنا په مجلس کې ژمنه وکړله چې د روسیې "پرضد" به دریږي او دا یې هم ومنله چې په سوریه کې په روغتونونو بمباری باید چې "جنګي جرمونه" وګڼل شي.