د لاس رسي وړ اتصالات

خلیلزاد د سولې د نورو ګامونو پر سرمشورې لپاره واشنګټن ته ستون شوی


د قطر په پایتخت دوحه کې د طالبانو او امریکايي استازو ترمنځ د خبرو د اتم پړاو په ترڅ کې دواړو خواو د نهو ورځو لپاره د هوکړې په جزئیاتو بحثونه وکړل.

د افغانستان د پخلاینې لپاره د امریکا ځانګړي استازي زلمي خلیلزاد په دوحه کې د وسله والو طالبانو سره د سولې د هوکړې د جزئیاتو پر سر د خبرو د اتم پړاو تخنیکي بحثونه، چې تیره ورځ پای ته ورسیدل ډیر ګټور بللي دي.

ښاغلي خلیلزاد تیره ورځ ناوخته ( زمري ۲۱ مه) د خپل ټویټر په پاڼه لیکلي، چې د سولې په برخه کې د نورو اقداماتو پر سر د سلا مشورو لپاره واشنګټن ته په لاره دی.

د زلمي خلیلزاد په مشرۍ د امریکایي پلاوي او وسله والو طالبانو د استازو ترمنځ د سولې د هوکړې پر سر د خبرو اتم پړاو د زمري د میاشتې په ۱۲ مه ورځ پیل شوی وو، چې تیره ورځ سهار وختي پای ته ورسید.

طالبانو هم د اتم پړاو خبرې ډیرې ګټورې بللي او ویلي دي، چې دواړو خواو موافقه کړې، چې د سولې د هوکړې په برخه کې د نورو ګامونو د پورته کولو لپاره خپلو مشرانو سره سلامشورې وکړي.

تراوسه د دواړو خواو ترمنځ د خبرو د بیا پیل لپاره کومه ڼیټه نه ده اعلان شوې، خو تمه کیږي، چې دواړه خواوې به د اختر د رخصتیو وروسته بیرته په دوحه کې خبرو سره کښیني.

د امریکايي او وسله والو طالبانو د استازو ترمنځ د سولې د هوکړې په هکله د خبرو لړۍ په داسې حال کې اوږده شوې، چې دمخه د لوی اختر وړاندې د دواړو خواوو ترمنځ د هوکړې ته د رسیدلو تمه کیدله.

افغان حکومت وايي، د طالبانو او امریکا ترمنځ د سولې د هوکړې وروستۍ متن ورسره نه دی شریک شوی، خو د اتم پړاو د پیل وړاندې زلمي خلیلزاد ورسره د هوکړې د ټولو پړاونو په باب سلامشورې کړي دي.

افغان حکومت وايي، د سولې د هڅو سره سره په افغانستان کې د تلې په شپږمه د جمهوري ریاست د ټاکنو لپاره هم پوره چمتوالی لري.

جمهور رئیس محمد اشرف غني د یکشنبې په ورځ د لوی اختر په مناسبت په خپله وینا کې په څرګنده وویل، چې د ملي یووالي د حکومت د قانوني دورې پای ته رسیدلو ته کمې ورځې پاتې دي او اوسنی حکومت د سولې د هوکړې په اړه پریکړه نشي کولی.

ښاغلي غني وویل، چې د سولې د هوکړې لپاره ټاکنې ضروري دي.

همداشان ښاغلي غني وویل، سوله قاطیعت غواړي نو ځکه صلاحیت ته اړتیا ده.

ښاغلي غني وویل " مونږ له ولس څخه هرڅوک، چې انتخابوي دا د ولس حق دی، اما خپل راتلوونکي ولسمشر ته دا ولس واک ورکړي، چې د افغانستان سخت تصامیم په قوت او عزت سره ونیسي، ترسره او پلي یې کړي، بې له دې څخه څنګه سولې ته لاړ شو".

په افغانستان کې د سولې د بهیر د ګړندې کیدو سره سم د جمهوري ریاست ټاکنیزې سیالۍ هم د زمري په شپږمه پیل شوي، خو ټاکنیزې سیالۍ هم تر ډیره د سولې د هوڅو تر اغیز لاندې راغلي دي.

د جمهوري ریاست د ۱۸ نوماندانو څخه یوازې د ګوتو په شمیر نوماندانو، چې جمهور رئیس محمد اشرف غني او اجرائیه رئیس عبدالله عبدالله هم په کې شامل دي، تراوسه خپلې ټاکنیزې سیالۍ پیل کړي دي.

XS
SM
MD
LG