سپین ږیری محمدلعل چې په پاکستان کې د کډوالۍ پر مهال په نشو اخته شوی وايي، څو ځله یې د درملنې هڅه کړې خو نه دی توانېدلی چې په روغتون کې ځان بستر کړي.
هغه چې د کابل پر واټونو له نورو معتادینو سره نشه يي توکي کاروي وايي کله چې نشه ونه کړي وضعیت یې خراب وي.
محمد لعل وايي " زه ټانکیس وم، دوې دورې عسکري مې کړې ده، بیا موټر چلاوه، پاکستان ته چې لاړم، ډېر تنګ وم، بیا یوه راته وویل چې دا وڅکوه غم دې لرې کوي، خو هغه یې غم نور هم را زیات کړ".
دغه معتاد تمه لري چې یو ورځ خپله درملنه وکړي او بېرته عادي ژوند ته راوګرځي.