د امریکا د فضایي څیړنو ملي ادارې (ناسا) اعلان کړی دی چې د ٢٠٢٠ کال له پیل نه د نړیوال فضایي مرکز دروازې د سیاحتي سفرونو او نورو سوداگریزو فرصتونو پرمخ پرانستل کیږي.
د ناسا مسولینو ویلي چې ټاکل شوې هر کال فضا ته دوه لنډ سیاحتي سفرونه وشي.
د ناسا د مالي چارو مسؤل د جمعې په ورځ وویل: "ناسا نړیوال فضایي مرکز د تجارتي فرصتونو او بازارموندنې پرمخ پرانيزي، هغه اقدام چې تر اوسه هیڅ سابقه نلري."
ناسا له دې دمخه د نړیوال فضایي مرکز څخه د هر ډول تجارتي استفادې مخالفت کړی و. خو ددې ادارې نوی اقدام په بشپړ ډول د نړیوال فضایي مرکز د خصوصي کولو لپاره د هڅو یوه برخه ده.
د امریکا د متحده ایالاتو جمهور رئیس دونالد ټرمپ تیر کال اعلان وکړ چې د نړیوال فضایي مرکز بودجه به چې د امریکا د دولت له خوا ورکول کیږي د ٢٠٢٥ کال پورې قطع کړي.
واشنگټن پوست رپوټ ورکړی د هغو کسانو لپاره چې دغه فضایي سفر ته لیوال دي په نړیوال فضایي مرکز کې یوه شپه اوسیدل شاوخوا ۳۵۰۰۰ ډالره لگښت لري.