د لاس رسي وړ اتصالات

پر امریکا له دوو لوریو سمندري‌ طوفان را روان دی


عکس: ارشیف

د امریکا د متحده ایالاتو د طوفان ملي مرکز د اتلانتیک په سمندر او د مکسیکو په خلیج کې څو سمندري موسمي طوفانونه څاري چې امریکا ته یې مخه کړې ده.

دا پداسې حال کې دي چې د پاولټ په نامه طوفان د برمودا جزیرې ته رسیدلی او د سالي په نامه بل طوفان د امریکا د متحده ایالاتو جنوبي ساحل ګواښي.

د هوا پیژندنې اداره وایي د سالي په نامه طوفان ښایي د سه شنبې په ورځ د لویزیانا ایالت سواحلو ته ورسیږي او ددې ایالت په سواحلو او همداشان د میسیسیپي او الاباما ایالتونو په ساحلي سیمو کې د طوفان خبرداریورکړل شوی.

دا پداسې حال کې دي چې د امریکا د لویزیانا ایالت تیره میاشت د لاورا طوفان سخت وځپه چې لا هم د بیرته رغیدو په حال کې دی. دغه طوفان پدې ایالت کې شپږ تنه مړه کړي وو او په میلیونونو ډالر زیان یې اړولی دی.

د امریکا متحده ایالات هر کال پدې موسم کې د موسمي طوفانونو سره مخامخ کیږي چې اکثر د مکسیکو له خلیج نیولې تر کاناډا پورې د متحده ایالاتو ساحلي ایالتونه ددغو طوفانونو له ګواښ سره مخامخ وي.

ددې تر څنګ هر کال په دوبي کې د امریکا په ځینو ځنګلونو کې اور لګیږي. سږکال دغه اورلګیدنې ډیرې پراخې وې چې شمالي کالیفورنیا، اورېګن، او واشنګټن ایالتونو ته یې زیات زیان ورساوه او د مقاماتو په وینا ددغه اور له کبله تر دې دمه ۳۵ تنه مړه شوي او څه باندې یو میلیون هکتار ځمکه وېجاړه شوې ده.

XS
SM
MD
LG