د لاس رسي وړ اتصالات

ناټو افغانستان ته ۳۰۰۰ نور سرتېري استوي


د ناټو غړي هېوادونه په برسل کې ټول شوي دي

د ناټو سازمان چارواکي وايي پرېکړه یې کړې ده چې افغانستان ته به ۳۰۰۰ نور سرتېري استوي.

په دې اړه به د ناټو غړي هېوادونه د را روانې پنجشنبې په ورځ هم خبرې وکړې. د ناټو عمومي منشي ینس سټولټنبرګ د بیلجیم په پایتخت بروسل کې وویل چې افغانستان کې به د خپلو سرتېرو شمېر له ۱۳۰۰۰ څخه ۱۶۰۰۰ ته لوړ کړي.

رویټرز خبري اژانس وايي چې نویو استول کېدونکو ځواکونو کې به نیمایي امریکايي او پاتې به یې د ناټو د نورو غړو هېوادونو وي.

د ناټو مشر وویل چې د نویو سرتېرو د استولو هدف په افغانستان کې د روان "بندبست" ختمول دي. دوې به افغان ځواکونو روزي، تجهیزوي او هغوې ته به سلا مشورې هم ورکوي.

د ناټو عمومي منشي وویل چې د افغانستان په هکله به د دغې ټولنې د دفاع وزیرانو د غونډې په دوهمه ورځ خبرې وشي. هغه وویل چې د افغانستان د دفاع وزارت د سرپرست جنرال طارق شاه بهرامي په ګډون به یو افغان پلاوی په دغه غونډه کې برخه واخلي.

د ڼاتو د دفاع وزیرانو غونډه د چهار شنبې په ورځ پیلیږي، په دې غونډه کې د افغانستان په اړه د خبرو سربیره د ناټو په جوړښت او د شمالي کوریا په مسلو هم خبرې کیږي.

د ناټو عمومي منشي وویل، چې په افغانستان کې د ناټو قوماندان د خپل پاکستاني سیال سره او هم د ناټو چارواکي د پاکستاني چارواکو سره په منظم ډول غونډې کوي او دغه هیواد ته یې ویلي چې هیڅ هیواد باید د افغان حکومت وسله والو مخالفانو ته پناه ورنه کړي.

ناټو مشر پر شمشاد د داعش وسله والو برید هم وغنده.

د ناټو عمومي منشي ینس سټولټنبرګ وویل چې په کابل کې د شمشاد خصوصي تلویزیون په دفتر باندې برید نه یوازې په یوې ملکي ادارې باندې برید دی، بلکې پر پرانیستې ټولنې برید هم دی.

ینس سټولټنبرګ وویل، چې افغان ځواکونو د شمشماد پر تلویزیون باندې د برید په مهارولو کې خپله کاري وړتیا وښودله او دا برید یې پای ته ورسوه. هغه دا هم وویل چې په افغانستان کې وروستۍ اونۍ سختې وې.

XS
SM
MD
LG