د انوېډیا د ټکنالوژۍ امریکايي شرکت د پنجشنبې په ورځ (نومبر ۱۲) اعلان وکړ چې د شرکت اجرائیوي رئیس جنسن هوانګ له خپلې دندې استعفا کړې ده.
د انوېډیا مدیره پلاوي په یوه خبرپاڼه کې د جنسن هوانګ د استعفا خبر ورکړی دی. په خبرپاڼه کې شرکت او د ټکنالوژۍ صنعت ته د هوانګ د «بېساري خدمت» څخه ستاینه شوې ده.
جنسن هوانګ څو ورځې وړاندې له یوې چینایۍ ښځې سره له واده بهر د اړیکو په لرلو اعتراف وکړ. د راپورونو له مخې، د امریکا استخباراتي ادارې دې نتیجې ته رسېدلي چې دغې ښځې د چین لپاره جاسوسي کوله.
د خبرپاڼې له مخې، د انوېډیا شرکت اجرائیوي مرستیاله کولیټ کریس به د سرپرستې اجرائیوي رئیسې په توګه دنده پر غاړه واخلي.
کریس ویلي: «موږ به خپلو هغو هڅو ته دوام ورکړو، چې انوېډیا یې د چټک کمپیوټري پروسس او مصنوعي ځیرکتیا په برخه کې مخکښ شرکت ګرځولی دی. همدارنګه به له شته فرصتونو ګټه واخلو. زموږ تمرکز به د پېرودونکو، شریکانو او ونډه لرونکو پر خدمتونو وي.»
د سې شنبې په ورځ د انویډیا شرکت د ونډو بیې راولوېدې.
د هوانګ د استعفا اعلان وروسته له هغه وشو چې له الیس هوانګ سره د هغه د اړیکې خبرونه خپاره شول. الیس هوانګ سوداګره او په سنګاپور کې د «مېګاسپیډ» په نوم د ټکنالوژۍ د شرکت پخوانۍ اجرائیوي چارواکې ده.
د راپورونو له مخې، امریکايي استخباراتي ادارې په دې باور دي چې الیس هوانګ د چین لپاره جاسوسي کوله. خو چین دغه تور رد کړی دی.
جنسن هوانګ د یکشنبې په ورځ په یوه اعلامیه کې له خپلې کورنۍ او انویډیا شرکت څخه بخښنه وغوښته او ویې ویل، چې د دې کړنو لپاره یې هېڅ توجیه نشته. نوموړي ژمنه وکړه، چې له څېړنو سره به بشپړه همکاري وکړي.
د متحدو ایالتونو ولسمشر ډونالډ ټرمپ د دوشنبې په ورځ خبریالانو ته وویل، چې د امریکا فدرالي تحقیقاتي اداره (ایف بي ای) د دې موضوع په اړه څېړنې کوي.
ټرمپ وویل چې له هوانګ سره یې خبرې کړې دي او هغه ورته ویلي، چې «هېڅ نه پوهېده چې دغه ښځه جاسوسه وه.»
ټرمپ د پنجشنبې په ورځ په خپلې ټولنیزې شبکې، ټروت سوشل کې په یو خپاره کړي پیغام کې وویل: «اوس چې د انویډیا اجرائیوي رئیس جنسن هوانګ، چې خورا غوره کار یې کړی، استعفا کړې ده، نو د هغه د ځای ناستي لپاره یوازې یو کس پاتې دی؛ هغه د اپل شرکت ټیم کوک دی. یوه افسانوي څېره د بلې افسانوي څېرې ځای نیسي.»
انویډیا شرکت د زبر ځیرکتیا یا مصنوعي ځیرکتیا په برخه کې چټکه وده کړې ده. هوانګ ددغه ټکنالوژۍ په برخه کې د انویډیا د پالیسو په اړه له ټرمپ سره مشورې کړې وې. نوموړي هڅه کوله، چې په چین کې د خپل شرکت د کمپیوټري چپونو د پلور لپاره پراخ بازار ته لاسرسی ومومي.
فورم \ دبحث خونه