د پاکستان صدراعظم یوسف رضا ګیلاني د چین له خوا جوړه شوې دوهمه اتومي بټۍ پرانیستله.
ښاغلي ګیلاني ددې بټۍ پرانیستل د پاکستان او چین ترمنځ د اتومي ساینس او ټیکنالوجۍ په برخه کي د همکارۍ " یو بل پیاوړی مثال " وباله.
د ٣٣٠ میګا واټو په طاقت دغه بټۍ د پنجاب د ولایت د ( چشمې ) په فابریکه کي چي مخکي لا هغې ته ورته یوه بله بټۍ فعاله ده، نصب شوې ده.
د چین سره قرارداد سوی چی په دې فابریکه کي به دوې نوري اتومي بټۍ هم جوړوي.
ټاکل سوې د پاکستان صدراعظم بله هفته چین ته په سفر ولاړ سي.
د چین سره د پاکستان اتومي اړیکي د امریکا د اندیښنې وړ مساله ده. امریکایي چارواکو په دې هکله په مستقیمه توګه مخالفت نه دی ښودلی، مګر ویلي یې دي چی که چین په ( چشمه ) کي د دریمي او څلورمي بټۍ په جوړولو هم پیل وکړي، نو دا به د هغو تعهداتو سره سم نه وي چي په ٢٠٠۴ کال کي یې کله چي د اتومي موادو د تهیه کونکو په ډله کي شامل سو، کړي وو.
پاکستان تل د انرجۍ د ستونزو سره مخامخ دی چي له کبله یې خلک سختي مظاهرې کوي.