د پاکستان په سنا کې چارواکو ویلي دي چې د هویت کارتونهیعني د تذکرو د ورکولو ادارې 'نادرا' په سلگونو افغانانو ته د دغه ملک شناختي کارډونه ورکړیدي.
پاکستاني چارواکو په سنا کې ویلي دي چې نادرا چې کومو افغانانو ته د پاکستان د هویت کارتونه ورکړیدي په هغوي کې ځینې د افغانستان د استخباراتي ادارو کار کونکي دي.
سناتور طلحه محمود په سنا کې پدغه مسله د غونډې نه وروسته یوې خبرې غونډې ته وویل چې ځینې هغه کسان چې پاکستاني هویت کارتونه لري، د هغوي په پاسپورټونو د هند ویزې هم دي.
سناتور محمود وویل چې دغه مسله یې د تحقیقاتو لپاره د پاکستان استخباراتي ادارې ته سپارلي ده.
هغه زیاته کړه چې نادرا شاوخوا ٥٠ تاجکانو ته هم د پاکستان تذکرې ورکړیدي.
ښاغلي طلحه دا هم وویل چې د پاکستان استخباراي ادارې آی ایس آی نادرا ته د هغو کسانو د پاکستاني او افغان تذکرو عکسونه ورکړې و خو تروسه پورې د نادرا ادارې یې سپیناوی ندی کړی.
د یادونې وړ ده چې پخوا هم په نادرا دغه ډول تورونه لگول شویدي چې غیر ملکیانو ته یې د پاکستان اسناد ورکړیدي.