افغان ولسمشر محمد اشرف غني، وايي، خلک د تلپاتې او باعزته سولې غوښتونکي دي او حکومت هم په هېواد کې سولې ته د رسېدو په برخه کې هڅې کوي.
ښاغلي غني د جمعې په ورځ د اکتوبر پر ۱۸مه «تلې ۲۶مه» په کابل کې د کندهار د پخواني وژل شوي امنیه قوماندان جنرال عبدالرازق د مړینې په مناسبت لومړي تلین کې وویل، چې افغانانو تر بل هر وخت د جګړې پای ته رسول او هېواد ته سولې راتلل حس کړي دي.
هغه وویل:"د افغانستان حکومت به د ملي ارزښتونو په چوکاټ کې، د هېواد لوړو ملي ګټو ته په کتو په پوره عقلانیت او د خلکو او په ځانګړي ډول د سولې مشورتي لوېې جرګې له غوښتونو سره سم دغه ملي بهیر مخته یوسي."
د افغانستان جمهوري ریاست د ولسمشریزو ټاکنو له تر سره کېدو یوه اونۍ مخکې اعلان وکړ، چې حکومت د سولې د خبرو په اړه خپلې ټولې هڅې درولې دي او زیاته کړې وه، چې دغه بهیر به د نوي حکومت تر رامنځته کېدو وروسته بېرته پیل شي.
ولسمشر محمد اشرف غني په دغه مراسمو کې د وینا پرمهال یو ځل بیا په ټینګار سره وویل، چې" جمهوري نظام، د ولسوالۍ ساتونکی دی."
هغه وویل:"د افغانستان خلک د طالبانو له مخامخ ګواښونو او د یوې نامطمینې سیاسي فضا سره سره د ميزان د شپږمې ولسمشریزو ټاکنو کې ګډون وکړ او د جمهوري نظام د پایښت او په هېواد کې یوې معناداره سولې ته د رسېدو په برخه کې خپل قوت وښوی".
دا په داسې حال کې ده، چې له طالبانو سره دا مهال د سولې هر ډول خبرې په ټپه درېدلي دي.
د تېرې سپټمبر میاشتې پر ۷مه د امریکا ولسمشر ډونالد ټرمپ هم له طالبانو سره د سولې خبرې لغوه اعلان کړې.
په امریکا د افغانستان سفیرې هم له امریکا غږ سره په یوې تازه مرکې کې ویلي، که طالبان سوله غواړي، باید له افغان حکومت سره مخامخ خبرې وکړي.