د امریکا د بهرنیو چارو وزارت وړاندیز کړی چې په ټولنیزو رسنیو کې د هغو کسانو فعالیت ارزیابي کړي چې غواړي ددې هیواد ویزه واخلي.
د امریکا د بهرنیو چارو وزارت دغه وړاندیز د سپینې ماڼۍ د بودجې او مدیریت دفتر ته د منظورۍ لپاره استولی دی.
ددې وړاندیز له مخې د مهاجرت او غیر مهاجرت د ویزو په گډون د امریکا د متحده ایالاتو د ویزې نژدې ټول درخواست کوونکي باید په ټولینزو رسنیو کې د خپلو ټولو هغو حسابونو په اړه معلومات د ویزو په درخواستونو کې ذکر کړي چې په تیرو پنځو کلونو کې یې ترې استفاده کړې.
د امریکا د بهرنیو چارو وزارت ویلي چې ددې اقدام هدف د هغو کسانو د هویت او سوابقو ارزیابي ده چې غواړي د امریکا ویزه واخلي.
که دا وړاندیز ومنل شي، هر کال باید د نړۍ شاوخوا ١۴،٧ میلیونه وگړي په ټولنیزو رسنیو کې د خپلو حسابونو معلومات د امریکا سفارتونو ته ور په لاس کړي.
داسې بریښي چې دغه وړاندیز به د جمهور رئیس دونالد ټرمپ د انتخاباتي ژمنو له مخې شوې وي چې په کلکه یې د امریکا د ویزې اخیستونکو په سوابقو باندې په غور کولو ټینگار کړی و.
ښاغلي ټرمپ ویلي وو چې د ترهگریزو فعالیتونو د مخنیوي په خاطر د هغو بهرنیانو د سوابقو ارزیابي سختوي چې غواړي د امریکا ویزه ترلاسه کړي.
له دې دمخه د امریکا قونسلگریو یواځې هغه وخت له یو درخواست کوونکي څخه په ټولنیزو رسنیو کې د هغه د حساب په اړه معلومات غوښتل چې پر هویت باندې یې شک کاوه او یا زیات غور ته به اړتیا وه.
د امریکا د مدني ازادیو اتحادیې (اکلو) د امریکا د بهرنیو چارو وزارت پدې تصمیم باندې اندیښنه څرگنده کړې او ویلی یې دي چې دغه تصمیم د بیان او ټولنو پر ازادۍ باندې "ناوړه" اثر لري.
د امریکا د بهرنیو چارو وزارت دغه تازه وړاندیز د جمعې په ورځ سپینې ماڼۍ ته لیږلی او امریکاییان ٦٠ ورځې وخت لري چې په اړه یې له منظورۍ دمخه خپل نظریات څرگند کړي.