په ارزګان کې د تازه نښتو په ترځ کې د ملي پوځ د یوه لوړ پوړي منصبدار په ګډون نهه تنه د پوځ سرتیري او لس تنه وسله وال طالبان وژل شوي.
امنیتي مقامات وايي چې تیره شپه وسله والوطالبانو په دغه برید کې د ترینکوټ په ختیځ کې د شاه منصور قرار ګاه هم د لنډ وخت لپاره نیولې وه، خو وروسته د ملي پوځ سرتیرودا قرارګاه بیرته ونیوله.
د ارزکان امنیه قومندان مل پاسوال رحمت الله صدیقي امریکاغږ اشنا رادیو ته وويل چې تیره شپه وسله والو طالبانو د شاه منصور پر امنیتي پوستو پراخه بریدونه وکړل چې د افغان ځواکونو له لوري پر شاه وتمبول شول.
مل پاسوال صدیقي " دښمن اوس له سیمې څخه ایستل شوی او درې ساعته جګړه کې يې لس تنه وژل شوي او ۱۵ تنه يې ژوبل شوی".
خو د ۲۰۵ اتل قول اردو ویاند ډګروال محمد صادق عیسی امریکاغږ اشنا رادیو ته وويل چې له وسله والو طالبانوسره د تيري شپې په جګړه په ارزګان د ملي پوځ د څلورمې لوا درستیزوال ډګروال نجیب الله او د پوځ درې نور منسوبین وژل شوي او څلور نورټپیان شوي دي.
د ۲۰۵ اتل قول اردو ویاند، وویل چې په دې جګړه کې ۲۷ طالب وسله وال وژل شوي او ۱۷ نورټپیان شوي دي.
خو د ارزګان ولایت یوې بلې سرچینې امریکا غږ اشنا راډیو ته وویل چې په دې جګړو کې د پوځ ۸ تنه نور سرتیري هم وژل شوي او ۱۶ تنه د پوځ سرتیري ټپیان شوي چې د کندهار نظامي روغتون ته د درملنې لپاره لېږدول شوي دي.
د ارزګان د والي ویاند دوست محمد نایاب هم د تیري شپې په جګړه کې د ملي پوځ ځینو سرتیرو ته د مرګ ژوبلې د اوښتو پخلی وکړ خو د جزئیاتو له ورکولو څخه يې ډډه وکړه
افغان ځواکونو له تیرو ۲ اونیو راهیسې د ترینکوټ ښار په ختیځ او شمال ختیځ کې د دولت د وسله والو مخالفینو پرضد په نظامي عملیاتو بوخت دي.
د ارزګان د والي ویاند دوست محمد نایاب امریکاغږ اشنا رادیو ته وويل چې د کوټ والو او شاه منصور په سیمو کې د افغان ځواکونو نظامي عملیات اوس هم دوام لري او په مهمو سیمو کې امنیتي پوستې جوړي شوي.
دا سیمې د ترینکوټ ښار څخه څلور کيلو میتره ختیځ او شمال ختیځ ته پرتې سیمې دي چې د ترینکوټ ښار د امنیت لپاره مهمې بلل کیږي.
وسله والو طالبانو د ارزګان د تازه نښتو په اړه کومه تبصره نده کړې.
