د امریکا د پخواني ولسمشر جورج هیربرت واکر بوش تابوت د چهارشنبې په ورځ (ډسمبر پنځمه) د واشنگټن په وخت د سهار په لسو بجو د کانگرس د مرکزي دهلیز څخه د رسمي مراسمو لپاره د واشنگټن لویې ملي کلیسا ته انتقال شوی دی.
د واشنگتن په ملي کلیسا کې د هغه د جنازې مراسم په یولسو بجو پیل شوي دي. په دغه مراسمو کې د امریکا پنڅه ولسمشران؛ د ولسمشر بوش زوی، پخوانی ولسمشر جورج ډبلیو بوش، جیمي کاتر، بل کلنتن، بارک اوباما او برحاله ولسمشر ډونالډ ټرمپ گډون لري.
په دغه مراسمو کې د ولسمشر بوش زوی، جورج ډبلیو بوش، د کاناډا پخوانی صدارعظم براین مالیروني، پخوانی امریکایي سناتور الن سمپسون او مورخ جان میچام ویناوې کوي.
د امریکا د یو څلویښتم ولسمشر د جنازې په دولتي مراسمو کې د گډون لپاره د بریتانیې شهزاده چارلس، د اردن بادشاه او ملکه ، د جرمني صدراعظمه انگلا میرکل د پولنډ ولسمشر او د نړۍ ځیني مشران واشنگتن ته راغلي دي.
د واشنگتن ځینې برخې د دغو مراسمو د ترسره کولو لپاره تړلي دي. حکومت د چهارشنبې ورځ ملي ماتم او او عمومي رخصتي اعلان کړې ده. په واشنگتن کې له رسمي مراسمو وروسته به د ولسمشر تابوت بیرته د تګزاس هیوستن ښار ته انتقال شي او هلته به د پنجشنبې ورځې تر اوو بجو پورې په کلیسا کې کیښودل شي.
ولسمشر بوش به د پنجشنبې په ورځ د بوش په ولسمشریز کتابون کې د خپلې میرمنې باربرا بوش او لور روبن ترڅنگ چې په څلور کلنۍ کې د وینې د سرطان له امله مړه شوې وه خاورو ته وسپارل شي.