د کندهار د ډنډ ولسوالۍ په کلانتر سیمه کې نن شنبه (اپریل ١٣) مازیګر د ناټو د قاطع ملاتړ د ماموریت پر سرتیرو د سړک د غاړې ماین چاودیدلی او دوه سرتیري یې ټپیان کړي دي.
عیني شاهدانو هم ویلي دي چې دا پیښه د سړک د غاړي د ماین د چاودنې په نتیجه کې شوې ده.
د کندهار د والي ویاند عزیز احمد عزیزي اشنا رادیو ته وويل چې د میانجوی په سیمه کې د بهرنیو پوځونو پر موټر د سړک د غاړي ماین چاودیدلی دی او ۲ بهرني عسکر چې هویت يې ندی معلوم، ټپیان شوي دي.
خو په جنوب کې د ناټو د قاطع ماموریت مطبوعاتي دفتر د یوې اعلاميې په خپرولو سره ویلي چې په پېښه کې ۲ رومانیايي عسکر ټپیان شوي.
اعلامیه زیاته وي چې چاودنه د نړیوالو قواوو د ګزمې پر موټر شوې.
میانجوی سیمه د کندهار نړیوال هوايي ډګر ته نږدې پرنه ده.
رومانیايي سرتیري تر ډيره د کندهار د نړیوال هوايي ډګر بهر د امنیت چاري سمبالوي چې په ترځ کې هره ورځ د ډنډ، دامان او تخته پل ولسوالیو په هغو سیمو کې چې د کندهار هوايي ډګر سره نږدې موقعیت لري، امنیتي ګزمې کوي.
تر اوسه چا د دې پېښي مسئولیت په غاړه ندی اخیستی.
