نن سهار ناوخته د کندز ولایت یوسیک اوسیدونکی نرمون سینګ چې په لالا دلسوز مشهور و، د نامعلومو وسله والو له خوا وژل شوی دی.
د کندز د والي ویاند محمود دانش وایي چې دغه یوناني طبیب د حاجي ګلستان د حمام په کوڅه کې د وسله والو له خوا ویشتل شوی چې په روغتون کې یې د سختو ټپونو له امله ساه ورکړې.
هغه وايي چې د لالا دلسوز د وژلو په تړاو تر اوسه څوک نه دي نیول شوي خو پولیس جدي څیړنې کوي چې ددغه وژل شوي طبیب قاتلین پیدا کړي.
لالا دلسوز دوه کاله وړاندې له یو وسله وال برید څخه روغ وتلی و.
په کندز کې د طالبانو د حکومت له سقوط وروسته تقریبا شلو هندوانو او سیکانو خپلې کورنۍ بیرته دغه ولایت ته راوستې وې، خو په سیمه کې د وروستیو ناامنیو له امله یوازې څلور کورنۍ په دغه ښار کې په خپل مذهبي ځای درمسال کې اوسیدې.
نرمون سینګ چې په لالا دلسوز مشهور و په کندز کې د اهل هنود مشر هم ټاکل شوی و.
تراوسه لا چا د نرمون سینګ د وژلو مسولیت نه دی اخیستی.
