د امریکا د بهرنیو چارو وزارت د جمعې په ورځ ډسمبر ۱۰ (لیندۍ۱۹) د بشري حقونو د نړیوالې ورځې د لمانځلو په مناسبت د یوګانډا، چین، بیلاروس، بنګله دیش، سریلانکا او مکسیکو د حکومتونو په ۱۲ چارواکو د بندیزونو لګول اعلان کړل.
د بهرنیو چارو وزیر انټوني بلنکین ویلي چې پدې حکومتي چارواکو د بشري حقونو د جدي سرغړاونو تورونه دي.
ښاغلي بلنکین وویل: " هوډمن یو چې بشري حقونو ته د خپلې بهرنۍ پالیسې په مرکز ځای ورکړو او یو ځل بیا ټینګار کوو چې بشري حقونو ته د پام راګرځولو او د سرغړاونې او ناوړه ګټه اخیستنې سره د حساب کتاب کوونې مروج کولو لپاره به د مناسبو امکاناتو او صلاحیتونو څخه کار اخلو".
د متحده ایالاتو کانګریس د بهرنیو چارو وزیر ته دا صلاحیت ورکوي چې امریکا ته دهغو بهرنیو هیوادونو حکومتي چارواکي او د کورنۍ غړي د راتګ نه منع کړي چې د بشري حقونو په سرغړاونو او یا فساد کې لاس ولري.
د بهرنیو چارو وزارت د چین ۴ اوسني او پخواني چارواکي د بندیزونو په لیست کې شامل کړي چې د سین کیانګ په نیمه خومختاره سیمه کې د اویغور مسلمانانو سره په ناوړه چلند کې لاس لري.
په واشنګټن کې د چین د سفارت یو ویاند ددې بندیزونو په غبرګون کې ویلي چې د دې بندیزونو سره کلک مخالفت څرګندوي او غنندي یې.
ویاند لیو پینګیو امریکا غږ ته پدې هکله وویل، "د امریکا دا کړنې د چین په کورنیو مسایلو کې جدي لاس وهنه ده او د چین – امریکا اړیکو ته جدي زیان رسوي."
د بهرنیو چارو د وزارت تر څنګ د امریکا د خزانې وزارت هم د بشري حقونو د قانون له مخې په ۲۵ افرادو او ادارو بندیزونه لګولي. د وزارت په اعلامیې کې راغلي چې په چین، بنګله دیش، شمالي کوریا، برما او روسیې کې په افرادو او ادارو بندیزونه لګیدلي دي.