یوې حکومتي سرچینې امریکا غږ اشنا راډیو ته ویلي چې د امریکا ددفاع وزیر جیمز متیز او د ناټو عمومي منشي یانس ستولتنبرګ نن سهار په یوه ناڅاپي سفر پلازمینې کابل ته رسیدلي او ټاکل شوې چې د ورځې په اوږدو کې به له افغان چارواکو سره لیده کاته وکړي.
دغې سرچینې چې نه یې غوښتل نوم یې واخیستل شي وویل د امریکا د دفاع وزیر او د ناټو عمومي منشي به نن د ورځې په یوولسو بجو له ولسمشر محمد اشرف غني او اجرائیه رئیس ډاکتر عبدالله عبدالله سره وګوري.
د سرچینې په وینا دواړه لوري به د امریکا د ولسمشر ډونالډ ټرمپ د جنوبي اسیا او افغانستان په تړاوو په نوې ستراتیژۍ او دغې سترایژۍ پهپلي کیدو سره بحثونه وکړي.
دې سرچینې زیاته کړه چې په دې بحثونو کې د افغان ځواکونو په تیره بیا د ځانګړو او هوايي ځواکونو د وړتیاوو په زیاتیدو خبرې هشاملې دي
همداشان دا سرچینه وایي په دې کتنو کې به له ترهګرۍ سره مبارزه او ددغې مبارزې اړخونه هم وارزول شي.
د امریکا د دفاع وزیر جیمز متیز تر دې وړاندې د هند په نوي دهلي کې وو او هلته یې هندي چارواکو سره د امریکا - هند د نظامي همکاریو ترڅنګ په افغان روان وضعیت هم خبرې کړي دي.
ټاکل شوې د دغو خبرو په پای کې جمهوررئیس غني د امریکا د دفاع وزیر او د ناټو له سرمنشي سره یو ګډ خبرې کنفرانس ته وینا هم وکړي.
په هوايي ډګر راکټي بریدونه
د امریکا د دفاع وزیر او د ناټو د سرمنشي له راتګ وروسته په یوولس بجو او لسو دقیقو د کابل په هوايي ډګر راکټي برید وشو خو دغه راکتي برید مرګ ژوبله نه درلوده.
د کورنیو چارو وزارت مرستیال ویاند نجیب دانش له امریکا غږ سره په خبرو کې وویل چې درې راکټي نن شاوخوا یوولس بجې د حامد کرزي په هوايي ډګر په ختیځه څنډه کې لګېدلي دي.
ښاغلي دانش وویل چې تراوسه پورې د تلفاتو راپور ندی ورکړل شوی.
نجیب دانش دا هم وویل چې په الوتنو کې کوم ځنډ ندی راغلی او الوتکې نورمال الوتنې کولی شي.