د لاس رسي وړ اتصالات

د امریکا د دفاع وزیر په کرونا اخته شوی


د دفاع وزیر ویلي چې په مهمو غونډو کې به په آنلاین بڼه برخه اخلي.

د امریکا د متحده ایالاتو د دفاع وزیر لیوډ آستن د یکشنبې په ورځ جنوري دویمه (مرغومي ۱۲) وویل چې د کرونا په ویروس اخته شوی.

ښاغلی آستن پداسې حال کې په کرونا اخته شوی چې په متحده ایالاتو کې د کرونا نوې بڼه (اومکیرون) په چټکۍ د خپریدو په حال کې ده.

لویډ آستن په یوې اعلامیې کې ویلي چي د ناروغۍ علایم یې "سپک" دي خو د راتلونکو پنځو ورځو پورې به په خپل کور کې قرنطین وي.

د دفاع وزیر په اعلامیې کې همدارنګه ویلي چې د کرونا ضد د دواړه ډوزه واکسین تر څنګ تقویتي واکسین هم کړی. لیوډ آستن ویلي چې د واکسین له کبله یې ناروغۍ جدي نده.

په اعلامیې کې راغلي، "واکسین کار کوي او زمونږ د کاري ځواک لپاره به نظامي روغتیايي شرط وي. زه ټول هغوي چې په شرایطو برابر وي تقویتي واکسین ته هڅوم".

د دفاع وزیر همدارنګه ویلي چې د جمهور رئیس جو بایډن سره یې د وروستي ځل لپاره د ډسمبر د میاشتې په ۲۱ مې اړیکه نیولې او په هماغه سهار چې د ښاغلي بایډن سره کتل، د کرونا معاینات یې منفي راغلي و.

لیوډ آستن په اعلامیې ویلي چې د امکان تر حده به په مهمو غونډو کې په آنلاین بڼه برخه اخلي.

ښاغلی آسټن لومړنی جګپوړي امریکایي چارواکی ندی چې د کرونا په ویروس اخته کیږي، بلکې تر هغه وړاندې د کانګریس ګڼ شمیر غړیو وویل چې د سپنې ماڼۍ ویانده جین ساکي هم د تیر کال د اکټوبر په میاشت کې پدې ویروس اخته شوې وه.

د کرونا نوې بڼه اومیکرون د روغتیا د نړیوال سازمان له خوا ددغه ویروس پنځمه خطرناکه بڼه بلل شوېده. دا ویروس تیره میاشت په جنوبي کرویا کې وموندل شو او ډیر ژر سرایت کولی شي.

XS
SM
MD
LG