امریکا په افغانستان کې د اسلامي دولت یا داعش د خراسان څانګې د څو جګپوړو چارواکو او د یو مالي ملاتړ کوونکي چې دې ډلې ته د بهرنیو جنګیالیو په پیدا کولو کې مرسته کوي نومونه د نړیوالو ترهګرو په ځانګړي لیست کې شامل کړل.
د بهرنیو چارو وزارت پدې ځانګړې لیست کې د داعش-خراسان د څانګې د جګپوړي مشر ثناالله غفاري، سلطان عزیز اعظم او مولوي رجب نومونه وراضافه شوي.
ثناالله غفاري چې په ثناالله او شهاب المهاجر هم مشهور دی،د ۲۰۲۰ کال د مې د میاشتې راپدیخوا وروسته تر هغه د دې ډلې مشر وټاکل شو چې پخوانی مشر یې د افغانستان امنیتي ځواکونو ونیوه.
استخباراتي معلومات چې د همدې روان کال په پيل کې د ملګرو ملتونو د ترهګرۍ ضد چارواکو سره شریک شوي، پکې ویل شوي چې غفاري د کابل د یوې سیمې نه فعالیت کوي او د دې ډلې غړیو په همدې سیمې کې چې نوم یې ندی اخیستل شوی د وسله والو پټ مرکزونه جوړ کړي و.
د داعش-خراسان د دې جګپوړیو غړیو تر څنګ چې نومونه یې د امریکا د بهرنیو چارو وزارت د ترهګرو پدې ځانګړې لیست کې اچول شوي، د امریکا د خزانې وزارت د عصمت الله خالوزي په نامه په یو تن بندیز لګولی. خالوزی د داعش-خراسان څانګې یو جګپوړی مالي ملاتړ کوونکی او مرسته کوونکی بلل شوی.
د خزانې وزارت په اعلامیې کې ویل شوي چې خالزوي د داعش د جګپوړیو غړیو لپاره څو ماموریتونه کړي او د بهرنیو جګړه مارانو سره افغانستان ته په راتګ کې مرسته کوي.
د نړیوالو ترهګرو پدې ځانګړې لیست کې د داعش-خراسان د جګپوړیو چارواکو د نومونو په اضافه کولو سره د واشنګټن لپاره آسانه کیږي چې هغو پیسو او شتمنیو ته د دوي او ملګرو لاسرسی بند کړي چې د امریکا مالي نظام سره تړاو لري.
سره لدې چې د افغانستان د حکومت، طالبانو او امریکایي ځواکونو لخوا د ۲۰۲۰ کال په لومړنیو شپږو میاشتو کېد داعش-خراسان ډله په افغانستان کې د هغوي د قوي مرکزونو نه وشړل او وځپل شوه، خو د افغانستان نه د امریکایي ځواکونو تر وتلو وروسته دغه ډله یو ځل بیا په افغانستان کې فعاله شوې.
په افغانستان کې د ملګرو ملتونو یو جګپوړي دپلومات تیره اوونۍ خبرداری ورکړی و چې داسې ښکاري د داعش-خراسان ډله تقریباً د افغانستان په ټولو ولایتونو کې حضور ولري.
د ملګرو ملتونو تر څنګ د امریکا د متحده ایالتو د استخباراتي ادارو او دفاع وزارت جګپوړو چارواکو هم خبرداری ورکړی چې دغه ترهګره ډله ښایي لږ تر لږه په راتلونکو ۶ میاشتو کې د امریکا او لویدیځ په ګټو د برید کولو توان تر لاسه کړي.
امریکایي چارواکي اټکل شوي چې داعش ښایي په افغانسان کې لږ تر لږه ۲ زره وسله وال ولري خو دا چې طالبانو د اګست په میاشت کې په کابل کې د واک نیولو نه وروسته د افغانستان د ټولو زندانونو څخه بندیان خوشې کړل، پدې سره د داعش-خراسان د غړیو شمیر هم ډیر شو.
د داعش خراسان څانګې په افغانستان کې پدې تیرو څو کالونو کې د څو خونړیو بریدونو د کولو ادعاوې کړلې چې تر ټولو غټه یې د کابل په هوایي ډګر کې هغه مهال وه چې د امریکا په مشرۍ نړیوالو ځواکونو د افغانستان نه د خطر سره مخ افغانان را ایستل. په برید کې د ۱۳ امریکایي ځواکونو په ګډون څه باندې ۱۵۰ ملکي افغانان ووژل شول.
د طالبانو او امریکا تر منځ د سولې په تړون کې چې په ۲۰۲۰ کال کې په دوحه کې لاسلیک شو، طالبانو منلې چې په افغانستان کې به د داعش، القاعدې او نورو ترهګرو ډلو د فعالیت مخه نیسي تر څو دا ډلې ونشي کړی خل استخدام کړي، مالې مرستې راټولې کړي او بالاخره په غربي هیوادونو بریدونه وکړي.