د لاس رسي وړ اتصالات

امریکا د مسکو څخه د مهاجرت ویزو ورکول بند کړل


متحده ایالاتو د ویزو د لیږد ملامتي په مسکو اچولې.

د امریکا د بهرنیو چارو وزارت تائید کړه چې د مسکو په سفارت کې یې متحده ایالاتو ته د مهاجرت ویزې بندې کړي او هغه روسي اتباع چې ویزه غواړي، باید ګاونډي هیواد پولینډ ته ولاړ شي.

متحده ایالاتو د دې کار ملامتي د روسیې لخوا په لګول شویو محدودیتونو اچولې. امریکا پداسې حال کې د روسیې په ځای وارسا ته د مهاجرت د ویزو ورکول بهیر انتقال کړی چې د واشنګټن او مسکو تر منځ ستونزې ډیرې شوې.

روسیې د متحده ایالاتو دا پرېکړه غندلې ده.

د دې هیواد د بهرنیو چارو د وزارت ویاندې ماریا زخاروف په تند غبرګون کې ویلي چې امریکایي دیپلوماتانو د ډیرې مودې راهیسې په روسیه کې د قونسلي خدماتو سیستم له منځه وړی.

خو د امریکا د بهرنیو چارو وزارت یو ویاند په یوې اعلامیې کې چې د فرانس پریس خبري اژانس ته استول شوې لیکلي، " د روسیې د حکومت د دې پریکړې له کبله چې د روسي اتباعو او یا درېیم هیواد مامورینو ګمارل، ساتل او قرارداد کول یې منع کړي، د قونسلي خدماتو په برخه کې یې زمونږ په وړتیا جدي اغیز کړی".

په اعلامیې کې همدرانګه ویل شوي چې په روسیه کې د قونسلي خدماتو د مامورینو شمیر بې حده لږ دی او نشي کولی عادي ویزې او امریکایي اتباعو ته خدمات وړاندې کړي.

په اعلامیې کې همدارنګه د مهاجرت د ویزې د متقاضیانو نه غوښتل شوي چې په وارسا کې د امریکا په سفارت کې د وخت اخیستو پرته دې سفر نکوي. وارسا د پولینډ نه ۱۲ سوه کیلو متره لیرې دی او د امریکا د بهرینو چارو وزارت هم منلې چې د ویزو د بهیر لېږدول "غوره حل" نه و.

په اعلامیې کې ویل شوي، " مونږ په څو عواملو غور وکړ چې نږدیتوب، د پروازونو موجودیت، د متقاضیانو آرامتیا، زمونږ په سمیه ایزو مامورینو کې په روسي ژبې خبرې کوونکي پرسونل او د مامورینو موجودیت پکې شامل دي."

د امریکا د بهرنیو چارو د وزارت په ویبسایټ کې روسیه د هغو څو هیوادونو په لیست کې اچول شوې چې "متحده ایالات پکې هیڅ قونسلي استازیتوب نلري او یا سیاسي یا امنیتي وضعیت پکې دومره نازک یا نا معلوم دی چې د قونسلګرۍ مامورین نشي کولی د مهاجرت ویزو غوښتنلیکونه طی مراحل کړي".

پدې لیست کې ډیری هیوادونه د متحده ایالاتو سره یا هیڅ اړیکې نلري او یا یې اړیکې چندانې ښې ندي. کیوبا، اریتیریا، ایران، لیبیا، سومالیه، جنوبي سودان، سوریه، ونزویلا او یمن پدې لست کې شامل دي.

XS
SM
MD
LG