د سپینې ماڼۍ په اعلامیې کې چې سه شنبه جون ۲۷ (چنګاښ۶) د واشنګټن پر وخت د شپې ناوخته خپره شوې، راغلي چې د لومړي ځل لپاره سپینه ماڼۍ کې د جمهور رئیس مرستیاله کاملا هریس او خاوند یې ډوګلاس ایمهوف د مسلمانانو د ټولنې استازو سره لوی اختر لمانځي.
د متحده ایالاتو جمهور رئیس جو بایډن او میرمن یې جل بایډن یې پدې اعلامیې کې د نړۍ مسلمانانو ته د لوی اختر مبارکي ورکړې.
په اعلامیې کې همدرانګه ویل شوي چې متحده ایالات ویاړي چې د میلونونو مسلمانانو کور دی او د دې هیواد کلتور یې لا غني کړی او په ګډې ښیګڼې کې همکاري کوي.
په اعلامیې کې د زرګونو امریکایانو په ګډون د هغو میلیونونو مسلمانانو یادونه هم شوې چې سږ کال سعودي عربستان ته د حج د فریضې ادا کولو لپاره تللي دي.
په اعلامیې کې راغلي چې د حج په مراسمو کې د نړۍ مسلمانان خپل قیمتي شیان پریږدي او یوازې سپین رنګی احرام اغوندي چې د "برابرِی" څرګندونه کوي.
"دا نظر هغو ارزښتونو ته ورته دی چې زمونږ ملت پرې جوړ دی. دا چې مونږ ټول برابر خلق شوي یو او دا چې د ژوند کولو، آزادۍ او د خوښۍ لټون لپاره حق لرو".
د اعلامیې په پای کې د نړۍ ټولو مسلمانانو کورونو او زړونو ته په لوی اختر کې خوښۍ، سولې او یووالي لپاره د دعا غوښتنه شوې.
جمهور رئیس بایډن تیر کوچنی اختر هم په سپینې ماڼۍ کې د مسلمانانو د ټولنې د استازو سره په سپینې ماڼۍ کې لمانځلی و.
بایډن د اختر په مراسمو کې د مسلمانانو د ټولنې له استازو د مننې په لړ کې وویل: "تاسو د هغو مدني ټولنو مشري کړې چې د مهاجرینو او معلولینو سره يي مرسته کړې، د ښځو لپاره مو ټولنه کې ځای مساعد کړی او د تبعیض پرضد دریدلي یاست. په همدې ډول، د مسلمانانو فرهنګ د امریکا په ټول فرهنګي تاریخ کې د موسیقۍ، فلم، ادبیاتو، فیشن او نورو هنرونو کې برخه لرله."
ولسمشر بایډن د اسلام ضد او مسلمانانو پر ضد د کرکې او تبعیض سره د خپل حکومت د مبارزې یادونه وکړه: "دا زما د حکومت په لمړیتوب کې دی. ځکه خو مې د ادارو ترمنځ د یو بشري ځواک څانګه جوړه کړه چې پر مسلمانانو د حملو او د مسلمانانو سره د تبعیض پرضد مسایل وڅیړي."
بایډن وویل، اوس وخت په امریکا کې ۳.۵ میلیونه مسلمانان دي او دا مسلمانان مختلف قومونه او نژادونه او بېلابېلې ژبې لري، خو ټول د امریکايانو په نوم متحد او واحد دي.