د پاکستان د بلوچستان په ایالت کې د کانونو په یوه پراخ مرکز کې د پنجشنبې په ورځ، د جولای ۳۰مه، په چاودنې کې لږ تر لږه ۳۴ کانکیندونکي وژل شوي دي.
چاودنه د کوټې ښار ته څېرمه په سورانج په یوې لرې پرتې سیمې کې شوې.
په سیمې کې د کانونو یو جګپوړي دولتي چارواکي، عبدالغني بلوچ، ویلي چې د میتان ګاز د یوې زورورې چاودنې له امله څنګ ته دوه نور کانونه هم زیانمن شوي دي.
د بلوچستان د طبیعي ناورینونو د ادارې د عملیاتو مشر محمد فهد ویلي، د ژغورنې عملیات لا هم روان دي څو هغه دوه کانکیندونکي پیدا او وژغورل شي چې لا تر اوسه تر خاورو لاندې بند پاتې دي.
د بلوچستان د کانونو او معدني پراختیا وزیر شعیب نوشېرواني ویلي، د چاودنې پر مهال ۳۶ کسان د کان په هغه برخه کې په کار اخته وو چې وروسته ونړېده.
د ایالت د کانونو لوی مفتش محمد عاطف ویلي، د ژغورنې ډلې په شاوخوا ۴۰۰۰ فوټه، یا ۱۲۱۹ متره، ژوروالي کې د بند پاتې کسانو د موندلو هڅې کوي.