پاکستاني چارواکو یو ځل بیا ادعا کړې چې په پاکستان کې د ترهګرۍ بریدونه د افغانستان له خاورې څخه تنظیمیږي او په لاره اچول کیږي؛ هغه ادعا چې د طالبانو حکومت تل رد کړې ده.
د پاکستان د ډان ورځپاڼې د راپور له مخې، د خیبر پښتونخوا د ۱۲ ناامنو سیمو ویاند محمود جان بابر د چهارشنبې په ورځ (نومبر ۱۱) په پېښور کې یوې خبري غونډې ته وویل چې وسله وال د ترهګریزو بریدونو د ترسره کولو لپاره د شپې له تیارې څخه ګټه اخلي او پاکستان ته ننوځي.
دغه پاکستاني چارواکي د خیبر پښتونخوا د ناامنو سیمو له اوسېدونکو وغوښتل چې د وسله والو ډلو د ایستلو لپاره له حکومت او امنیتي ځواکونو سره همکاري وکړي. د هغه په وینا، د سیمه ایزو شوراګانو او خلکو په همکارۍ به په راتلونکو دریو میاشتو کې په دغو سیمو کې د امنیت د ټینګښت امکان برابر شي.
خو په افغانستان کې د طالبانو حکومت د پاکستان هغه تورونه په وار وار رد کړي چې ګواکې د افغانستان خاوره د ترهګریزو بریدونو د تنظیم لپاره کارول کېږي. د طالبانو ویاند ذبیح الله مجاهد د اکتوبر په میاشت کې د پاکستاني چارواکو ددغه راز څرګندونو په غبرګون کې ویلي و چې په پاکستان کې ناامني د افغانستان په ګټه نه ده او افغانستان نه د نورو هېوادونو د ناامنۍ د رامنځته کولو او نه هم د تمویل کولو وس لري.
مجاهد همدارنګه پاکستاني چارواکي تورن کړي وو چې د خپلو کورنیو امنیتي ستونزو د حل پر ځای، د ناامنۍ پړه پر افغانستان اچوي.
دغه تورونه په داسې حال کې بیا مطرح کېږي چې په اسلام اباد کې د «مارګله ډیالوګ» په غونډه کې یو شمېر پاکستاني سیاستوالو او کارپوهانو له افغانستان سره د پاکستان د سیاست د بیاکتنې غوښتنه کړې ده. هغوی خبرداری ورکړی چې د کړکېچونو دوام، د سرحدي لارو تړل کېدل او د سوداګرۍ کمېدل د دواړو هېوادونو سیاسي او اقتصادي اړیکو ته زیان رسولی دی.
د پاکستان پخواني سناتور مشاهد حسین د افغانستان په اړه د اسلام اباد پر تګلارې نیوکه کړې او خبرداری یې ورکړی چې د دې سیاست دوام ممکن افغانستان د پاکستان سیال هېواد، هند، ته لا نږدې کړي.
د پاکستان صدراعظم مرستیال اسحاق ډار د مارګله ډیالوګ په غونډه کې د افغانستان له خاورې څخه د ترهګرو ډلو فعالیتونه یوه جدي امنیتي ننګونه وبلله او د مخنیوي لپاره یې د اغېزمنو اقداماتو غوښتنه وکړه.
اسلام اباد داسې مهال خپل تورونه تکراروي چې ګواکې د طالبانو حکومت د پاکستان ضد وسله والو ډلو، په ځانګړي ډول د تحریک طالبان پاکستان ملاتړ کوي.
تحریک طالبان پاکستان د چهارشنبې په ورځ (نومبر ۱۱) د خیبر پښتونخوا په کوهاټ کې د هغه برید مسئولیت واخیست چې د پاکستان لږ تر لږه ۱۰ پولیس پکې ووژل شول.