د افغان سولې لپاره د امریکا د متحده ایالاتو ځانګړي استازي زلمي خلیلزاد د افغانستان د جمهور رئيس په لومړي مرستیال امرالله صالح باندې برید د سولې د روان بهیر د ودرولو هڅه بللې ده.
ښاغلي خلیلزاد د چهارشنبې په ورځ سپټیمبر نهمه (وږي ۱۹) ناوخته په خپل ټویټر کې لیکلي چې د سولې د فُرصت په رانږدې کېدو سره ورانکارو ډلو د دغه بهیر د ودرولو لپاره هڅې زیاتې کړې دي.
زلمي خلیلزاد د امرالله صالح د موټرو پر کاروان پرونی برید د دغو هڅو یوه بېلګه بللې او زیاته کړې یې ده: "د سولې د خبرو له رانږدې کیدلو سره ورانکاري پخپلو دې هڅو کې لانور ناهیلي کیږي چې دغه تاریخي فرصت زیانمن کړي".
1/3 As peace talks near, spoilers are becoming more desperate in their attempt to disrupt this historic opportunity. Today%27s attack on @AmrullahSaleh%27s convoy is the latest example. Luckily, he survived. Tragically, this terrorist attack killed and wounded many bystanders.
— U.S. Special Representative Zalmay Khalilzad (@US4AfghanPeace) September 9, 2020
د ملګرو ملتونو عمومي منشي انتونیو ګوتیرش دا برید غندلی او د افغانستان د جګړې د پای ته رسولو لپاره د سولهییزه لارو چارو پر موندلو ټینګار کړی.
هغه په یو بیان کې ویلي چې ملګري ملتونه په دې مهم بهیر کې د افغانستان له خلکو او حکومت څخه ملاتړ کوي.
Secretary-General @antonioguterres speaks out against attack on First Vice President Amrullah Saleh%27s convoy in Kabul, reiterating the urgency of achieving a peaceful settlement to the conflict in #Afghanistan @UNAMAnews https://t.co/NN5Rj9WXzq
— UN Spokesperson (@UN_Spokesperson) September 10, 2020
تیره ورځ په کابل کې د افغانستان د جمهوري ریاست د لومړي مرستیال امرالله صالح د موټرو پر کاروان چاودنه وشوه او نوموړی په کې برسېرن ټپي شو. په دې چاودنه کې ۱۰ تنه ملکي وګړي ووژل شول او د ښاغلي صالح د یو شمیر ساتونکو په ګډون لسګونه نور ټپیان شول.
دغې پېښې ته په ملي او نړیواله کچه غبرګونونه ښودل شوي دي. د افغانستان جمهور رئیس محمداشرف غني ویلي چې ترهګر او د هغوی بهرني ملاتړ د داسې "جنایتونو" په کولو سره سوله، جمهوریت او د افغانستان راتلونکې نشي کمزورې کولی.
په کابل کې د امریکا د سفارت شارژدافیر راس ویلسن په امرالله صالح باندې برید د اندیښنې وړ بللی او ویلي یې دي د امریکا متحده ایالات په جدي توګه د هغو هڅو ملاتړ کوي چې ژر په دوحه کې د دوامداره سولې او د تاوتریخوالیو د پای ته رسیدو لپاره پیل شي.
طالبانو په دغه برید کې خپل لاس لرل رد کړي او کومې بلې ډلې هم تر اوسه ددې برید مسؤلیت نه دی منلی.
د افغانستان د کورنیو چارو وزارت ویلي په دې چاودنه کې د ( RDX-HMS + Nitroglycerin) ډوله موادو څخه استفاده شوې او زیاته کړې یې ده چې له دغو موادو څخه پخوا په هغو بریدونو کې هم استفاده شوې چې مسولیت یې د حقاني شبکې په غاړه اخیسته.
زلمي خلیلزاد ویلي چې د سولې بهیر هغه وخت بریالی کېدلی شي چې په افغانستان کې اوږده جګړه پای ته ورسېږي او دې هدف ته رسېدل "دوو مرکچي ډلو او مشرانو" پورې یې اړه لري.