د سعودي عربستان په مشرۍ ایتلاف وايي چې د حوثیانو له خوا د سعودي عربستان د پایتخت ریاض پر لور توغول شوی بالستیک توغندی یې شنډ کړی او په یمن کې یې ددغه ډلې پر مرکزونو پراخ بریدونه کړي دي.
په یمن کې د ایران د ملاتړ لرونکو حوثیانو سره په جګړه بوخت دغه ایتلاف ویاند جنرال ترکي المالکي د دوشنبې په ورځ (اکتوبر ۲۶) په ټولنیزو رسینو کې په خپاره کړي یو بیان کې ویلي چې د یمن په مرکز صنعا کې د حوثیانو د بالستیک توغندیو توغوونکي دستګاوې او د توغندیو زیرمې یې له منځه وړي دي.
المالکي وویل: «د ایتلاف د ګډو ځواکونو قوماندانۍ ځانګړي پوځي عملیات ترسره کړل، چې موخه یې د ګواښونو د سرچینو له منځه وړل وو.»
المالکي زیاته کړې چې د ایتلاف په عملیاتو کې د حوثیانو د جګړې د لومړۍ کرښې مورچلونه، جنګیالي او پوځي تجهیزات هم په نښه شوي او اکمالاتي لارې یې پرې شوي دي. هغه ادعا کړې چې له دې عملیاتو سره پر سعودي عربستان باندې د حوثیانو د هوايي بریدونو وړتیا محدوده شوې ده.
د سعودي په مشرۍ د ایتلاف له اعلان څو ساعته وړاندې د دوشنبې په سهار په پایتخت ریاض کې د چاودنو غږونه اورېدل شوي وو.
حوثیانو ادعا کړې چې د ریاض د ملک خالد پر نړیوال هوايي ډګر یې بیا برید کړی دی. ددغې ډلې ویاند یحیا سریع ویلي چې د سعودي عربستان په جنوبې کې یې ددغه هېواد د سمندري او هوايي ځواکونو اډې هم په نښه کړي دي.
د سعودي دولتي تلویزیون له خوا خپاره شوي انځورونه ښيي چې د سعودي عربستان په جنوبي ښار خمیس مشیط کې یوه استوګنیزه ودانۍ او څو موټر زیانمن شوي دي. د سعودي چارواکو په وینا، د حوثیانو له خوا توغول شوی یو کروز توغندی یې شنډ کړی او ددې توغندي رالوېدلو ټوټو په سیمه کې اوسېدونکو ته زیان اړولی دی.
سعودي عربستان په تېرې یوې میاشتې کې وروسته له هغې د حوثیانو پر ضد خپل هوايي بریدونه زیات کړي چې دې ډلې د سره سمندرګي په څنډو کې ځینې ستراتیژیکې سیمې ونیولې او د باب المندب تنګي ته نږدې شول. باب المندب د نړیوالۍ سوداګرۍ لپاره یو مهم تنګی دی او د خلیج د نفت لرونکو هیوادونو لپاره د نفتو د لېږد اساسي مسیر ګڼل کېږي.
د اکتوبر د پیل کې راهیسې، د ریاض د ملک خالد نړیوال هوايي ډګر په ګډون په سعودي عربستان کې د حوثیانو په بریدونو کې لږترلږه ۱۳ کسان وژل شوي چې دا په څه باندې لسو کلونو کې په سعودي کې تر ټولو خونړي بریدونه دي.
په یمن کې د جګړې بیا پیل هغه اوربند مات کړی چې د ملګرو ملتونو په منځګړیتوب په ۲۰۲۲ کال کې رامنځته شوی و.
حوثیانو په ۲۰۱۴ کال کې پایتخت صنعا ونیو او یو کال وروسته، په ۲۰۱۵ کې، د سعودي عربستان په مشرۍ ایتلاف د یمن د حکومت د ملاتړ لپاره په جګړه کې شامل شو.
د یمن حکومت د نړیوالو لخوا په رسمیت پیژندل کیږي.
حوثیانو پر سعودي هوايي ډګرونو، بندرونو او د تیلو پر تاسیساتو بالستیک توغندي او بې پیلوټه الوتکې توغولي، چې له امله یې په منځني ختیځ کې ناامني پراخه شوې ده.
د امریکا د بهرنیو چارو وزارت، د حوثي اورپکو د توغندیو او بې پیلوټه الوتکو د بریدونو د خطر په پام کې نیولو سره، له امریکایي وګړو څخه غوښتنه کړې چې سعودي عربستان ته په خپل سفر له سره غور وکړي.