ښاغلي ټرمپ په خپل یو تازه ټویټ کې پاکستان تورن کړی چې له امریکا څخه یې میلیاردونه ډالر ترلاسه کول خو مرسته یې نه کوله.
دا په تېرو شاوخوا ۲۴ ساعتونو کې دویم ځل دی چې ولسمشر ټرمپ پر پاکستان داسې تند انتقادونه کوي.
ښاغلي ټرمپ په خپل تازه ټویټ کې لیکلي دي چې پاکستان اسامه بن لادن پټ کړی و خو امریکا ته یې په اړه هېڅ معلومات نه ورکول.
هغه وايي اسامه او افغانستان له امریکا سره د پاکستان د نه مرستو او همکاریو دوې ښکاره بېلګې دي.
....We no longer pay Pakistan the $Billions because they would take our money and do nothing for us, Bin Laden being a prime example, Afghanistan being another. They were just one of many countries that take from the United States without giving anything in return. That’s ENDING!
— Donald J. Trump (@realDonaldTrump) November 19, 2018
په همدې حال کې د پاکستان لومړي وزیر عمران خان ویلي دي امریکا دې په افغانستان کې د خپلې ناکامۍ ملامتي په پاکستان نه اچوي.
عمران خان د ولسمشر ټرمپ له دغه ټویټ نه څو دقیقې وروسته په خپل رسمي ټویټر کې ولیکل چې باید ښاغلی ټرمپ په تاریخي حقایقو پوه کړل شي.
هغه وویل پاکستان د امریکا په جنګ کې ډېر څه له لاسه ورکړي او اوس هغه څه کوي چې د خلکو په ګټه یې وي.
Trump’s false assertions add insult to the injury Pak has suffered in US WoT in terms of lives lost & destabilised & economic costs. He needs to be informed abt historical facts. Pak has suffered enough fighting US%27s war. Now we will do what is best for our people & our interests
— Imran Khan (@ImranKhanPTI) November 19, 2018
ښاغلي ټرمپ تر دې مخکې له فاکس تلویزون سره په مرکې کې هم ویلي وو چې پاکستاني چارواکي پدې خبر و چې د القاعدې د شبکې مخکنی مشر چیرته دی خو امریکا ته یې پدې هکله هیڅ معلومات نه وو ورکړی.
د ولسمشر ټرمپ له راتګ وروسته د واشنګټن-اسلام اباد اړیکې خرابې شوي دي او سپینې ماڼۍ پر پاکستان خپلې ټولې ژمنې شوې مرستې بندې کړي دي.
دا خبرې داسې مهال کیږي چې په افغانستان کې له طالبانو سره د سولې هلو ځلو زور اخیستی دی.
د افغانستان د سولې او بیا پخلاینې لپار د متحدو ایالتونو د بهرنیو چارو ځانګړي سلاکار زلمي خلیلزاد هیله څرګنده کړې چې ښايي د افغانستان د ولسمشریزو ټاکنو مخکې له طالبانو سره د سولې تړون وشي.