په افغانستان کې د امریکايي او ایتلافي ځواکونو له خوا هوايي بریدونو د روان کال په تېرو شپږو میاشتو کې تر تېرو دوو کلونو زیات شوي دي.
په افغانستان کې د ناټو په مشرۍ د غوڅ ملاتړ ماموریت وايي چې د دوئ هوايي بریدونه د افغان ځواکونو د مرستې لپاره کیږي تر څو هغوئ خپل هدف ته ورسیږي. د غوڅ ملاتړ ماموریت ویاند وايي چې په دغو بریدونو کې د ولسي وګړو مرګ ژوبلې ته جدي پاملرنه کوي.
افغان حکومت وايي چې دغه بریدونه له دوئ سره په همغږۍ ترسره کیږي. په افغانستان کې د ناټو په مشرۍ د غوڅ ملاتړ ماموریت ویاند وايي تېر کال ولسمشر اوباما دغو ځواکونو ته له افغان ځواکونو سره د مرستې لپاره د هوايي بریدونو په برخه کې اضافي واکونه ورکړل.
په افغانستان کې د غوڅ ملاتړ ماموریت ویاند کپتان بیل سلوین وايي د بریدونو پر مهال د عامو خلکو ژوند ته پاملرنه کوي.
د امریکا د هوايي ځواک د شمېرنو پر اساس امریکايي او ایتلافي ځواکونو په تېرو شپږو میاشتو کې په افغانستان کې څه د پاسه ۱۶۰۰ بمونه کارولي، په داسې حال کې چې دا شمېره تېر کال نژدې پنځه نیم سوه او په ۲۰۱۵ کې نژدې درې سوه وه.