د افغانستان د ټاکنو خپلواک کمیسیون وایي چې د پنجشنبې پر ورځ به د پارلماني او ولسوالیو شوراګانو د احتمالي نوماندانو لومړنی لست خپور شي.
د یاد کمیسیون د ویاند مرستیال ذبیح سادات امریکا غږ ته وویل چې تیر ورځ د ۳۳ ولایتونو څخه د هغو کسانو اسناد چې پارلمان او ولسوالیو شوراګانو ته یې د نوماندۍ فورمۍ اخیستي دي د ټاکنو کمیسیون مرکزي دفتر ته لیږدول شوي دي.
ښاغلي سادات وویل که څه هم د دغو موادو په لیږد کې څه ناڅه ځنډ شوی دی خو اوس د اسنادو د ارزونې لپاره کار جریان لري.
ښاغلي سادات د یادو اسنادو د ناوخته لیږلو لامل د هوایي ځواکونو بوختیاوې یادې کړې.
ښاغلي سادات دا ډول وویل وروسته له هغې چې د غزني ولایت ټاکنې حوزوي شوې د ټاکنو خپلواک کمیسیون په دې کار کوي چې په دغه ولایت کې د خلکو او نوماندانو د نوملیکنې لپاره چمتوالی ونیسي.
دوه ورځې وړاندې د ټاکنو خپلواک کمیسیون د غزني ولایت د اوسیدونکو د اعتراضونو په نتیجه کې پریکړه وکړه، چې په غزني ولایت کې به حوزوي ټاکنې ترسره کړي.
له ټاکنو څخه د څار یو شمیر بنسټونه بیا وایي چې د وخت د کموالي له امله به د ټاکنو کمیسیون ونه شي کولای ټول اسناد وڅیړي او سبا ته د نوماندانو لومړنی لست خپور کړي.
له رڼو ټاکنو څخه د څار بنسټ یا فیفا اجراییوي مشر یوسف رشید امریکا غږ ته وویل"موږ فکر نکوو چې سبا ته د سرطان په اومه څنګه چې په تقویم کې ده کمیسیون لومړنی لست خپور کړي او له خلکو سره شریک کړي په دې دلیل چې د دوې څیړنې تر اوسه نه دي بشپړې شوي دوه ورځې مخکې د دوې مالومات او نماینده ګان د نوماندانو کابل ته نه وه راغلي او فکر کوم چې دا وخت ته ضرورت لري".
ښاغلي رشید همدارنګه زیاته کړه چې د قانون له مخې باید د نوماندانو د اسنادو د څیړلو بهیر په علني توګه ترسره شي او دا چاره باید د ټاکنیزو ناظرو بنسټونو،احزابو او مطبوعاتو په شتون کې تر سره شي. چې دده پر وینا تر اوسه داسې یو کار ندی ترسره شوی.