په ننګرهار کې چارواکي وايي چې د کوکنارو د بدیل لپاره یې هغو مرستو پایله ورکړې ده چې د ممپلیو د ترویج لپاره یې له کروندګرو سره کړې دي.
د کرنې ادارې د معالوماتو پر اساس په ننګرهار کې د ممپلیو په حاصلاتو کې د تېر کال په پرتله زیاتولی راغلی دی.
دېرش کلن سعد الله د ننګرهار په شېرزادو کې په نژدې نیم جریب ځمکه ځمکني بادام یا ممپلي کرلي، وايي له حاصلاتو یې خوشاله دي، ځکه د غنمو او جوارو په پرتله یې ګټه ډېره ده.
دی وايي مخکې به یې په ډېره ځمکه کوکنار کرل، خو اوس یې ممپلیو او یا د تازه مېوې باغونه اباد کړي دي.
هغه وايي " اوس ډېر خلک پر خپلو ځمکو داسې فصلونه کري چې ګټه یې ډېره او حلال وي".
د ننګرهار د کرنې اداره وايي تېرو څلورو کلونو کې یې دې ولایت کې د ممپلیو د ترویج لپاره هڅې کړي او کروندګرو د تېر کال په پرتله دوه چنده حاصل تر لاسه کړی دی.
دی وايي په راتلونکي کال کې به هم د دغه د ترویج لپاره له کروندګرو سره کومک وکړي، خو کروندګر وايي حکومت ور سره هغسې چې لازمه ده، کومک نه کوي.