ډاکټران وايي د نشهيي موادو مافیا هڅه کوي د معتادینو د درملنې مرکزونو ته نشهيي مواد دننه کړي او تر درملنې لاندې معتادینو ته په روغتون کې دننه د نشهيي موادو د کارولو زمینه برابره کړي.
د دغو مرکزونو له شمېرې په کابل کې د جنګلک د معتادینو د درملنې د ۲۵۰بستریز مرکز رئیس ډاکټر زلمي نورزي غوري امریکا غږ ته وویل چې هره اونۍ له ۱۰ تر ۱۵ تنه دغه مرکز ته د نشهيي موادو د لېږدولو په تور نیول کېږي.
ډاکټر غوري وايي "پایوازان راځي چې خپل مریضان ګورو موږ هلته یو ځای د ملاقات لپاره لرو چې تلاشي کېږي، له پایوازانو سره او له ناروغانو سره نشهيي موادو نیول کېږي".
د ډاکټر غوري په وینا د نشهيي موادو مافیا د معتادینو د درملنې مرکزونو ته د نشهيي موادو د لېږدولو لپاره کسان استخداموي ترڅو د درملنې بهیر له ننګونو سره مخ کړي.
هغه وایي که چېرې تر پنځو ګرامو نشهيي موادو په ځانګړي ډول هیرویین او شیشه د درملنې مرکز ته دننه شي او ناروغان ترې استفاده وکړي د دوی د درملنې ټولې هڅې له منځه ځي.
ډاکټر غوري له حکومت او په ځانګړي ډول له کشفي او امنیتي بنسټونو څخه وغوښتل چې د نشهيي موادو د مافیا په وړاندې جدی اقدام وکړي او د دغه غیرقانوني کار مخ ونیسي.