په افغانستان کې د طالبانو حکومت وايي چې په پکتیکا، خوست او ننګرهار ولایتونو کې د تېري شپې زلزلې له امله لږ تر لږه ۱۰۰۰ کسان مړه او ۱۵۰۰ نور ټپیان شوي دی.
په پکتیکا کې د طالبانو د اطلاعاتو او فرهنګ رئیس محمد امین حذیفه د فرانسې خبري اژانس ته ویلي دي چې په په زلزله کې د مړو شمېر ۱۰۰۰ ته ورسېده او ښايي دا شمېره نوره هم زیاته شي.
له طبیعي پېښو سره د مبارزې په چارو کې د طالبانو حکومت وزارت مرستیال مولوي شرف الدین مسلم نن چهارشنبه جون ۲۳ (چنګاښ لومړۍ) په کابل کې خبریالانو ته وویل چې د زلزلې له امله زیاته مرګ ژوبله په پکتیکا او خوست ولایتونو کې رامنځته شوې ده.
د طالب چارواکو په وینا د زلزلې له امله د ځاني زیان ترڅنګ ګڼ څاروي هم مړه شوي او د هستوګنې سلګونه کورونه هم نړېدلي دي. ښاغلي مسلم وویل چې د هر مړه شوي کس لپاره ۱۰۰زره افغانۍ او د هر ټپي شوي کس لپاره ۵۰زره افغانۍ په پام کې نیول شوي دي.
تر دې مخکې د طالبانو حکومت ویاند د زلزلې په اړه د طالبانو د رهبر ملا هبت الله اخندزاه د خواشینۍ پیغام کې ویلي وو چې په پکتیکا او خوست ولایتونو کې د تیرې شپې زلزلې له امله ۳۰۰ کسان مړه شوي او څه باندې ۵۰۰ نور ټپيان شوي دي.
د طالبانو حکومت ویاند ذبیح الله مجاهد په یوې اعلامیې کې ویلي چې د مرګ ژوبلې کچه کېدای شي نوره هم زیاته شي.
نوموړي زیاته کړې: "تیره شپه د پکتیکا ولایت په ګیان، نکي، برمل،زیړوک او د خوست ولایت په سپېري ولسوالیو په مربوطاتو کې سخته زلزله شوې چې تر دې دمه د راپورونو له مخې سلګونه کورونه نړېدلي او په تاسف سره چې تر ۳۰۰ هیودوال شهیدان او ۵۰۰ زیات ټپیان شوي دي."
د اعلامیې له مخې د طالبانو رهبر ملا هبت الله اخندازه د زلزله ځپلو کورنیو او دوستانو سره خواخوږي څرګنده کړې او د طبیعي پېښو ضد وزارت، خپلو والیانو او ټولو افغانانو څخه یې غوښتي چې له زلزله ځپلو سره د مرستې په هدف لازم اقدامات وکړي.
د طالبانو مشر له ټولو نړیوالو خیره بنسټونو څخه غوښتي چې په دغه لوی مصیبت کې افغانانو ته لاس ورکړي. باختر دولتي خبري آژانس بیا تر دې مخکې د ځايي طالب چارواکو له قوله ویلي و چې د تیري شپې زلزلې له امله د پکتیکا ولایت په برمل، زیړوک، نکي، کیان ولسوالیو کې ۲۵۵ کسان وژل شوي او څه باندې ۵۰۰ نور ټپیان شوي دي.
د سرچینې د معلوماتو په اساس د خوست ولایت د سپېرې ولسوالۍ په افغان دوبۍ سیمه کې هم د زلزلې له امله ۴۰ کسان مړه شوي او ۹۵ نور ټپیان شوي دي.
باختر خبري آژانس ویلي چې یوازې د تیري شپې زلزلې له امله یوازې د پکتیکا ولایت په ګیان ولسوالۍ کې ۲۱۶ کسان مړه شوي او څه باندې ۳۰۰ نور ټپیان شوي دي.
طالب چارواکو ویلي چې دا لومړني ارقام دي او د مرګ ژوبلې ارقام کېدای شي تغیر شي او په خبره یې اوس هم په سیمه کې له نړیدلو ودانیو څخه د خلکو د را ایستلو عملیات روان دي.
طالب چارواکو همدارنګه ویلي چې هغوی د زلزلې سیمې ته د هلیکوپټرو په ګډون ژغورونکي ډلې استولي او اوس مهال تر خاورو لاندې کسانو د ایستلو هڅې کوي.
پر همدې مهال د طالبانو حکومت د روغتیا وزارت وايي د زلزلې ځپل شوو کسانو ته پر وخت رسېدو لپاره په ټولو روغتيايي مرکزونو کې د بشپړې تیارۍ امر شوی دی. یاد وزارت زلزله ځپلو ته د لومړنیو بشري مرستو رسېدو لپاره پر ټولو همکارو بشري موسساتو غږ کړی چې سیمې ته ځان ورسوي.
له زلزله ځپلو سره د مرستې په هدف د طالبانو بېړنۍ غونډه
له دې سره هم مهاله د طالبانو حکومت کابینې د پکتیکا او خوست زلزلې ځپلو سره د مرستې په هدف ارګ کې بېړنې غونډه رابللې ده.
د طالبانو حکومت ویاند ذبیح الله مجاهد نن چهارشنبه ویلي چې د رئیس الوزرا ملا محمد حسن اخند په مشرۍ د کابینې غونډه کې له زلزله ځپلو سره د خواخوږي ترڅنګ ټولو اړونده ارګانونوته دنده سپارل شوې چې د زلزله ځپلو سیمې ته عاجل ټیمونه ولیږي.
مجاهد ویلي :"همدارنګه له شهیدانو او زخمیانوسره د نغدي مرستو او تداوي لپاره هم تدابیر ونیول شول. ورسره لارښونه وشوه چې د غذایې موادو، البسې، درملو او نورو اړینو توکو د رسولو او زخمیانو د انتقال لپاره دي د هوایې او زمیني ترانسپورت څخه کار واخستل شي."
پر همدې مهال د طالبانو حکومت رئیس الوزرا له زلزله ځپلو سره د مرستې په هدف یو میلیارډ افغانۍ منظور کړي دي. دا په داسې حال کې ده چې تیره شپه یاده سیمه کې بارانونه هم شوي دي.
د امریکا د جیولوژي اداره وایي چې د چهار شنبې په لومړنیو ساعتونو کې د ریکټر په کچه ۶.۱ درجې زلزلې د افغانستان او پاکستان یو شمیر سیمې ولړزولې.
دا اداره زیاتوي چې زلزله د خوست ښار په شاوخوا ۴۴ کیلومتري کې د ځمکې په ۵۱ کیلومتره عمق کې شوې ده. راپورونه وایي زلزله د افغانستان او پاکستان په شاوخوا ۵۰۰ کیلومتره ساحه کې احساس شوې ده. دا زلزله په کابل او اسلام آباد کې هم خلکو احساس کړې ده.