د افغانستان ملي امنیت وايي په برید کې یې د طالبانو قومندان وژلی خو د ولایتي شورا غړي وایي چې ملکیان وژل شوي دي.
افغان حکومت وايي په هوايي برید کې یې د طالبانو هغه کس وژلی چې دوه ورځې وړاندې یې د ملي امنیت پر یوه مرکز خونړی برید سمبال کړی و.
ملي امنیت په یوې اعلامیې کې ویلي دي چې د نعمان په نامه دغه طالب قوماندان یې د چهارشنبې په شپه (جنوری ۲۳) په یوه هوايي برید کې وواژه، وايي برید د میدان وردګ په میدان ښار کې شوی دی.
طالبانو تېره اونۍ که د دوشنبې په ورځ په میدان وردګ ولایت کې د ملي امنیت د ځواکونو د روزنې پر مرکز ډله ایز برید وکړ چې د چارواکو په خبره ۳۶ افغان امنیتي ځواکونه پکښې ووژل شول او شاوخوا ۵۸ نور پکښې ژوبل شول.
ملي امنیت وايي ملا نعمان د دغه برید اصلي پلان جوړونکی و.
په همدې حال کې طالبانو په یوې اعلامیې کې دا خبره رد کړې ده. نیویارک ټایمز د وردګ د ولایتي شورا د ځینو غړو له خولې لیکلي دي چې په دغه هوايي برید کې ملکیان وژل شوي دی.
د وردګ د ولایتي شورا غړي شریف الله هوتګ نیویارک ټایمز ته ویلي " په دغه برید کې شپږ ولسي خلک وژل شوي او یو بل ژوبل شوی دی. موږ کولی شو چې د دوی جسدونه درته وښايو، تاسو په کې د قومندان نعمان جسد پیدا کړئ."
عیني شاهدانو ویلي دي چې وژل شوي کسان غره ته تللي وو چې ښکار وکړي خو برید پرې شوی دی.