د افغانستان دفاع وزارت وايي، چې په فراه ولایت کې د امریکا د ځانګړو ځواکونو لومړنۍ ډله ځای پر ځای شوې ده.
د دغه وزارت د مطبوعاتو د دفتر سرپرست جنرال محمد رادمنش امریکا غږ – آشنا ته وویل، د امریکا د ځانګړو ځواکونو دغه ډله، په فراه کې د ترهګرۍ ضد د مبارزې په برخه کې د افغان پوځ سرتیرو ته روزنه او سلا مشورې ورکوي.
د جنرال رادمنش پر وینا، دغه امریکايي ځواکونه په فراه ولایت کې د ناټو په مشرۍ د قاطع ملاتړ ماموریت په چوکاټ کې، فعالیت کوي.
هغه زیاته کړه "دوی تلي چې د فراه ولایت په تعلیمي مرکز کې زموږ دفاعي ځواکونو ته لازیاته پوهنه او روزنه ورکړي او هغه تجهیزات چې تازه د دویمې لوا ۲۰۷ قول اردو ته ورکړل شوي دي، د هغې په اړه یو لړ درسونه چې لازمي دي، هغه پرمخ یوسي".
ښاغلي رادمنش همداشان وویل، چې دغه امریکايي ځواکونه به د بلوک، ټولي، کنډک او لوا په کچه هم د پوځ قوماندانانو ته چې په قرارګاه کې دننه فعالیت کوي، روزنې او مشورې ورکړي.
د جنرال رادمنش پر وینا، د امریکايي ځواکونو دغه ځانګړې ډله په فراه کې جګړهییز فعالیتونه نه ترسره کوي او د جګړې پر مهال یواځې د سلاکارۍ مسولیت لري.
د افغانستان او سویلي آسیا لپاره د امریکا د ولسمشر ډونالډ ټرمپ د نوې ستراتیژۍ له اعلان وروسته، دا د امریکا د ځانګړو ځواکونو لومړنۍ ډله ده، چې په فراه ولایت کې ځای پر ځای کیږي.
سیمهییزو چارواکو هم تائید کړې، چې تیره شپه ځانګړي امریکايي ځواکونه د فراه ولایت په هوايي ډګر کې ځای پر ځای شوي دي.
د ظفر ۲۰۷ قول اردو ویلي، چې دغه ځواکونو به د تروریستي ډلو د ځپلو په عملیاتو کې هم برخه اخلي.
فراه د افغانستان په لویدیځ کې له ایران سره پولې ته څیرمه پروت ناامنه ولایت دی او وسلهوال طالبان په کې پراخ حضور او فعالیت لري.