د جرمني د اردو مقاماتو دوه جرمني عسکر له دې کبله برطرفه کړي دي چی په یولړ جنجالي عکسونو کی هغوی ولیدل سول چی په افغانستان کی د مړو د ککریو سره لوبي کوی .
دا خبر نن د جرمني ددفاع وزیر جوزف ینگ خپور کړ .
اصلي موضوع د چارشنبې په ورځ هغه وخت برالا سوه چی د بیلد ورځپاڼي هغه عکسونه چاپ کړل چی د رپوټونو په اساس په ٢٠٠٣ کال کی اخیستل سوي وو او په یوه کی یې یو جرمن عسکر د یوې ککرۍ سره ولاړ دی او جنسي اکټونه کوی .
د جرمني د آرـ ټي ـ آیل تلویزیون پرون هغه عکسو نه هم وښودل چی یو عسکرد مړي ککرۍ مچوی او یو بل عسکر بله ککرۍ په عسکري موټر باندی ایښې ده چی نور یې وگوري .
دې عکسونو زیات جرمنیان په غوصه کړي دي . صدراعظمي انجیلا مرکیل هغه د کرکي وړ او نه بخښونکی عمل بللی دی .
ددفاع وزیر یې ویلي دي چی پوځ لږ تر لږه شپږ عسکر پیژندلي دی او وعده یې کړې چی هغوی ته به سزا ورکړه سی .